“Sabahın Ulduzları” layihəsi çərçivəsində keçirilən “Bakı Kuboku uğrunda yarışlar – 2026” turnirində müxtəlif nominasiyalar üzrə ən yaxşı futbolçular müəyyənləşib.

Prosport.Az xəbər verir ki, U-14 və U-15 yaş qruplarında mübarizə aparan gənc futbolçular arasında turnirin ən yaxşı oyunçuları, eləcə də ayrı-ayrı mövqelər üzrə fərqlənənlər seçilib.

U-14 yaş qrupunda turnirin ən yaxşı oyunçusu adına “Ulduz” FA-nın futbolçusu Uğur Hüseynli layiq görülüb. Ən yaxşı qapıçı mükafatı “Qarabağ”dan Hüseyn Qurbanova, ən yaxşı müdafiəçi mükafatı “Sabah”ın üzvü Ramiz Qarayevə təqdim olunub.

“Qarabağ”ın futbolçusu İbrahim Müzəəffərli ən yaxşı yarımmüdafiəçi, “Ulduz” FA-nın üzvü Hünər Səmədli isə ən yaxşı hücumçu seçilib.

U-14-də bombardir adına “Neftçi”nin futbolçusu Adil Şabanov yiyələnib. O, turnirdə 23 qol vurub.

“Sabahın Ulduzu” mükafatı isə “Azərbaycan Qartalları”nın futbolçusu Emir Əmirxanova verilib.

U-15 yaş qrupunda turnirin ən yaxşı oyunçusu “Neftçi"nin üzvü Emil Quliyev seçilib. Ən yaxşı qapıçı adına “Qarabağ”dan Yusif Məmmədli, ən yaxşı müdafiəçi adına “Ulduz” FA-dan Asif Allahverdizadə layiq görülüb.

EFA-nın futbolçusu Hüseyn Novruzlu ən yaxşı yarımmüdafiəçi, “Ulduz” FA-nın üzvü Yusif Əlizadə isə ən yaxşı hücumçu seçilib.

U-15 yaş qrupunun bombardiri “Neftçi”nin futbolçusu İlham Qubadov olub. O, turnirdə 15 qol vurub.

“Sabahın Ulduzu” mükafatı isə EFA-nın futbolçusu Şahin Qasımzadəyə təqdim olunub.

Qeyd edək ki, U-14 yaş qrupunda ilk üç pilləni “Qarabağ” FK, “Sabah” FK və “Ulduz” FA tutub. U-15-də isə “Ulduz” FA qalib olub, “Neftçi” PFK ikinci, “Qarabağ” FK üçüncü yeri tutub.