Azərbaycan Premyer Liqasının VIII turunun “İmişli” – “Turan Tovuz” oyunundan (1:0) sonra nominal meydan sahibi komandanın baş məşqçisi Ervins Perkins jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Göstərdikləri səyə və istəyə görə, futbolçularıma təşəkkür edirəm. İlk hissədə çox möhtəşəm performans sərgilədilər. Bütün boşluqları bağlaya bildilər. 2-ci hissədə o qədər də yaxşı deyildik. Komandamda yorğunluq hiss olunurdu. Amma yenə də layiqli 3 xal qazandıq.

– Qısa müddətdə nələri dəyişdiniz?
– Enerjini artırdıq. Rəqibə təzyiq göstərmək məsələsini də dəyişdik. Oyunçulardan bəlkə də çox şey tələb etmişdik. Amma onlar bunu çox yaxşı yerinə yetirdilər. Bundan əlavə, bəzi taktiki dəyişikliklərə əl atdıq. 

– Komandanın yeni baş məşqçi olmağa hazırsınız?
– Hələ ki çox da uzağı düşünmürəm. Son hadisələrdən sonra mənə məlumat verildi ki, baş məşqçiyəm. Yəni ki, bu həftəlik. Əlimdən gələni etdim, bu oyun üçün hazırlaşdıq. Amma ümumi olaraq, bu sual mənə aid deyil. Burada olduğum müddətdə əlimdən gələni edəcəyəm. Rəhbərliklə bu haqda danışmamışam. Sadəcə bizi təbrik etdilər.

– Aleksandr Starkovsdan sonra Azərbaycanda çalışan ikinci latviyalı məşqçisiniz…
– Bu, bir az gülməli hadisədir. Çünki PRO lisenziyasına hazırlaşanda, hər zaman yanındaydım, müəllimim idi, mənə məsləhətlər verirdi. Davamlı olaraq da görüşürdük. Azərbaycana gəlməmişdən əvvəl, hətta onunla danışdım və məsləhətləşdim ki, “sizcə, gedim, yoxsa necə?”. Bildirdi ki, get, yaxşı təcrübə olar. Hələ də onunla əlaqədəyik.