Azərbaycan Basketbol Liqasında "Sumqayıt" üzərində 86:69 hesablı inamlı qələbə qazanan "Neftçi"nin baş məşqçisi Konstantinos Vasiliadis matçdan sonra klubun mətbuat xidmətinə açıqlama verib.

Prosport.Az xəbər verir ki, yunanıstanlı mütəxəssis komandasının xüsusilə müdafiə xəttindəki çıxışından razı qaldığını bildirib:

"Bu gün çox yaxşı oyun nümayiş etdirdik. Düşünürəm ki, xüsusilə ilk 20–25 dəqiqə ərzində yüksək səviyyədə, gərgin tempdə və müdafiədə etibarlı oynadıq. Nəticədən razıyıq, çünki rəqibin 70-dən çox xal qazanmasına imkan vermədik. Bu, daxili çempionatda qarşımıza qoyduğumuz əsas hədəflərdən biridir".

O, komandasının hücum potensialına və avrokubokdakı növbəti sınağa da toxunub:

"Hücuma gəldikdə isə bilirik ki, bəzən uğurlu, bəzən də uğursuz günlərimiz ola bilər. Lakin hər matçda çoxlu sərbəst atış imkanları yaradır və yaxşı hücumlar qururuq. Bütün oyunçularımız meydanda çox ağıllı hərəkət edirlər. Onlar həm özləri, həm də komanda yoldaşları üçün əlverişli vəziyyətlər yaratmağı bacarırlar.

Oyunçular sabahı istirahətlə keçirəcəklər. Daha sonra FIBA Avropa Kubokundakı növbəti matçımıza hazırlaşacağıq. Bizi çox gərgin və rəqabətli qarşılaşma gözləyir. Ümid edirəm ki, zədəlilərimiz sağalacaq, səfərə tam heyətlə yollanaraq layiqli mübarizə apara biləcəyik".