Azərbaycan Basketbol Liqasında "Neftçi"yə 69:86 hesabı ilə yenilən "Sumqayıt"ın baş məşqçisi Uğur Özdemir matçdan sonra açıqlama verib.

Prosport.Az xəbər verir ki, Türkiyəli mütəxəssis komandadakı əsas çətinliyin uyğunlaşma prosesi ilə bağlı olduğunu bildirib:

"Rəqibi təbrik edirəm. Bəzən yaxşı oynadıq, bəzən isə oyundan qopduq. Ancaq bunlar haqqında çox danışmaq istəmirəm. Zamanla çox fərqli bir komanda görəcəksiniz. Bu sancılı mərhələni geridə qoyduqdan sonra daha yaxşı olacağıq. Hələ ki müəyyən problemlər yaşayırıq, çünki bir-birimizi yaxşı tanımırıq. Oyunçular hətta mənim onlardan tam olaraq nə tələb etdiyimi hələ tam anlamırlar. Birlikdə az məşq etməyimizdən qaynaqlanan səhvlərimiz olur. Bu oyunlar bizim üçün bir növdür hazırlıq matçı xarakteri daşıyır, çünki cəmi üçüncü qarşılaşmamızdır".

Təcrübəli baş məşqçi komandanın potenasialına inandığını və hədəflərinin böyük olduğunu vurğulayıb:

"Heyətimiz keyfiyyətlidir, sadəcə zaman lazımdır. Mənim komandalarım hər zaman yüksək hədəflər uğrunda mübarizə aparır. Vaxtilə "Xırdalan"da bunu bacarmışdım, "Sumqayıt"ı da eyni səviyyəyə qaldırmaq istəyirəm".