Azərbaycanın karate üzrə dünya çempionu İrina Zaretskaya bu gün Yaponiyanın Fukuoka şəhərində keçirilən Premyer Liqa yarışında mübarizəyə başlayıb. O, ötən ay Mərakeşin paytaxtı Rabatda keçirilmiş Premyer Liqa turnirinə özünün tapdığı maliyyə hesabına yollanmışdı. Buna səbəb Azərbaycan Milli Karate Federasiyasının yaşadığı maliyyə böhranıdır.
Prosport.Az 27 yaşlı idmançıdan bu və digər məsələlərlə bağlı müsahibə götürüb.
– Bu mövsüm ilk qızıl medalınızı Mərakeşdə qazandınız. Özü də martda İspaniyada keçirilmiş Avropa çempionatının finalında uduzduğunuz İsveçrə təmsilçisi Elena Kuiriçidən revanş aldınız...
– Mənim üçün mövsüm əla keçir. Hər yarışımda medal kürsüsünə çıxıram. Bu il ilk medalım yanvarda Misirin paytaxtı Qahirədə keçirilmiş Premyer Liqa turnirində oldu. Avropa çempionatının finalında Kuiriçi ilə qarşılaşdım. Hakimlərin qərarına əsasən finalda qələbə ona verildi. Rabatdakı Premyer Liqada isə hamıya qalib gəldim. Cəmi 1 xal rəqibə verdim, o da mübahisəli idi. Hazırlıqlarım plan üzrə gedir. Bu ay Polşadakı Avropa Oyunları və oktyabrda Macarıstanın paytaxtı Budapeştdə keçiriləcək dünya çempionatı öncəsi bu, vacibdir. Bu mötəbər turnirlərə maksimal olaraq hazırlaşıram. Sizin sözünüzə gəlincə, mən heç kəsdən revanş almağa çalışmıram. Öz planım üzrə irəliləyirəm. Gördüyünüz kimi, hər dəfə nəticə göstərirəm.
– Artıq şəxsi məşqçiniz Denis Morozov yığmada işləmir. Bu sizə çətinlik yaratmır?
– Mənə çətinlik yaradan Olimpiya Oyunları və İslam Həmrəylik Oyunları zamanı olan əvvəlki peşəkar yanaşmanın olmamasıdır. İndi isə Avropa Oyunlarına hazırlaşmaq və yarışlara getməyim üçün özüm maliyyə tapmalıyam. Azərbaycanı layiqincə təmsil etmək, bayrağı qaldırmaq və medal kürsüsünə çıxmaq üçün orada özüm məşqçi axtarışına çıxmalıyam. Bax, bunlar mənə çətinlik yaradır. Əlbəttə, mənə Denislə birgə çalışmaq rahat idi. O, çox yaxşı məşqçidir və millini ən yaxşı səviyyəyə qaldırdı. Hazırda qadınlarda Avropa Oyunlarına 4 lisenziyamızın olmasında onun böyük əməyi var. Ümumilikdə isə 8 lisenziyamız var. Avropa Oyunlarında karatenin kumite növü üzrə ən çox lisenziya qazanan ölkə bizik. Mən bizim komandanın necə çalışdığını görürəm və niyə görə əvvəlki kimi yarışlara gedə bilmədiyimizi anlamıram.
– Sirr deyilsə, Mərakeşdə iştirakınız nə qədər maliyyə vəsaitinə səbəb oldu?
– Bu məbləği deməyəcəyəm. Amma onu deyə bilərəm ki, bizə Avropa çempionatından sonra demişdilər ki, Mərakeşə mütləq gedəcəyik. Ancaq bu sözlər tutulmadı və son anda səfərdən imtina edildi. Bu isə biletin ikiqat baha başa gəlməsinə səbəb oldu.
– Rafael Ağayevin paylaşımında görmüşdük. Siz və Rafael birgə Ekvadorun paytaxtı Kitoda seminar keçirəcəksiniz. Bu necə baş verdi?
– Bu təklif mənim və Rafael Ağayevin karateçi dostlarından gəldi. Onlar ötən ilin sentyabrında Bakıda baş tutmuş Premyer Liqa yarışına gəlmişdilər, Ekvadordan idilər. Həmin insanlar Rafael Ağayevlə mənim seminarımı təşkil edəcəklər. Biz orada master-klass keçəcəyik, gənc nəsillə öz bildiklərimizi bölüşəcəyik. Bu seminar iyulun sonlarında olacaq.
Səbuhi Musa
P.S. İrina Zaretskaya Fukuokadakı yarışa Gənclər və İdman Nazirliyinin maliyyəsi hesabına yollanıb.
