Azərbaycan Üzgüçülük Federasiyasının baş katibi Oqtay Atayevin Prosport.Az saytına müsahibəsi

– 3 gündür ki, Bakıda Avropa Su İdman Növləri Federasiyasının Konqresi keçirilir. Bu tədbirlərin keçirilməsində əsas məqsəd nədir?
​– Bildiyiniz kimi, Bakı 2026-cı ilin dünya idman paytaxtıdır və bu silsilədə ölkədə bir sıra tədbirlər keçirilir. Əlbəttə ki, bunların hamısı Azərbaycana bir təşkilatçı ölkə olaraq göstərilən etimadın bir əyani isbatıdır. Ötən həftə Bakıda üzgüçülük üzrə Dünya Kuboku keçirilirdi. Bu həftə Avropa Su İdman Növləri Federasiyasının Konqresi baş tutur. Bu, Avropa Federasiyasının Ali məclisidir, ildə bir dəfə baş tutur və demək olar ki, bütün ölkələr iştirak edir. Burada qitənin su idmanı növləri üzrə gələcəyi müzakirə olunur, hesabatlar təqdim olunur. Əlbəttə ki, bu cür tədbirlərin Azərbaycanda keçirilməsi sevindiricidir, çünki həm də bizi – Azərbaycan Üzgüçülük Federasiyasını, ümumiyyətlə ölkəmizi idmanda və su idmanı növlərində, o cümlədən aktiv iştirakçı bir ailə üzvü kimi göstərir.
​
– Adətən belə tədbirlər keçiriləndə hansısa bir yarışın da ev sahibliyi məsələsi gündəmdə olur. Azərbaycanda dünya və ya Avropa çempionatını keçirtmək üçün infrastruktur yetərlidirmi?
​– Azərbaycanda həm Avropa, həm dünya çempionatının keçirilməsi üçün infrastruktur mövcuddur. Həm idman tərəfdən, həm yerləşmə, nəqliyyat baxımından və s. tələblərə cavab veririk. Lakin hal-hazırda bu cür məsələlər müzakirə olunmur. Avropa çempionatı və ya dünya çempionatının Bakıda keçirilməsi hal-hazırda nəzərdə tutulmur.
​
– Bu ayın əvvəlində Dünya Kuboku Bakıda keçirildi. Adətən belə yarışlar müqavilə ilə bir neçə illik olur. Bu yarış üçün də belə bir müddət var, yoxsa sırf bu il üçün nəzərdə tutulmuşdu?
​– İpək Yolu turu çərçivəsində Dünya Kubokunun Bakıda, eləcə də Daşkənd və Astanada keçirilməsi birdəfəlik layihə kimi yalnız bu il üçün nəzərdə tutulmuşdu. Lakin istisna deyil ki, bu tədbir silsilə olaraq davam edə, ənənəvi ola bilər. Ancaq hazırda bu yöndə bir müzakirə, bir qərar yoxdur.

Səbuhi Musa