Çexiyanın “Slaviya Praqa” komandasının futbolçusu Lukaş Provod UEFA Çempionlar Liqasının əsas mərhələsində “Sabah”a 0:2 hesabı ilə məğlub olduqları oyunu dəyərləndirib.
Prosport.Az xəbər verir ki, 2-ci hissədə kapitan sarğısını daşıyan yarımmüdafiəçi qarşılaşmadan sonra klubun mətbuat xidmətinin suallarını cavablandırıb.
– Bakını xalsız tərk edirsiniz. Bunu necə dəyərləndirirsiniz? Qapıya 18 zərbə vurmusunuz, amma heç birini qola çevirə bilməmisiniz…
– Bunu qəbul etmək çətindir. Çempionlar Liqasında növbəti məğlubiyyətimizi aldıq. Bura qələbə qazanmaq üçün gəlmişdik, 0:2 hesablı yenilgidən sonra Bakını tərk etmək üçün yox. Yaxşı oynamadıq, matça da yaxşı başlamadıq. Ən böyük səhvimiz 0:1 hesabı ilə geriyə düşməyimiz oldu. Çünki rəqibin fiziki baxımdan zəiflədiyini hiss edirdik. Üstünlüyü ələ almağa başlayırdıq. Hesab 0:0 olsaydı, üstünlüyümüz daha da böyük olardı. Yaratdığımız qol imkanları da bunu göstərir. Təəssüf ki, yalnız geriyə düşdükdən sonra oynamağa başladıq. Təkrar edirəm, qol imkanlarını boşa vermək olmaz, qol vurmalıyıq. Bu gün bunu bacarmadıq.
– Özünüzün də bir neçə qol imkanınız oldu. Həmin epizodlarda başqa cür oynamaq mümkün idi? Məsələn, iki ardıcıl zərbə ilə nəticələnən epizodda…
– Əlbəttə, hər zaman başqa cür oynamaq mümkündür. Həmin epizod çox böyük fürsət idi. İlk zərbəni mümkün qədər dəqiq vurmağa çalışdım. Qapıçı üzərimə gəldi, təkrar zərbə zamanı isə çaşqın vəziyyətdə idim və sadəcə topa zərbə vurdum. Topun qapıya düşməməsini başa düşə bilmirəm. Amma bu, yeganə imkanımız deyildi, ümumilikdə kifayət qədər qol şansı yaratdıq. Uğur qazanmaq istəyiriksə, qol vurmalıyıq.
– Qarşılaşmaların belə sıx qrafiklə keçirilməsi yaxşıdır? Həftəsonu çempionat oyunu, ardınca isə “Fənərbağça” ilə görüş üçün səfər…
– Bir tərəfdən, əlbəttə, yaxşıdır, digər tərəfdən isə yox. Oyunlar çoxdur və yorğunluq toplanacaq. Amma geniş heyətimiz var, rotasiyalar olacaq və hər şey qaydasında olacaq. Komanda yoldaşlarımız yaxşı formadadır, bizi daha çətin oyunlar gözləyir. Ötən mövsüm də başa düşdük ki, ölkə çempionatında da uğur qazanmalıyıq. Bu, çətindir, amma indi diqqətimizi “Hradeç Kralove” ilə oyuna yönəldəcəyik və yalnız həmin qarşılaşmaya köklənəcəyik.
– “Sabah”ın qapıçısını məyus etmək, demək olar ki, mümkün olmadı…
– Hər zaman mümkün qədər yaxşı zərbə vurmağa çalışırsan. Hamımız qol vurmaq istəyirik, amma bu gün top qapıya getmədi. Məşqlərdə bunun üzərində işləməliyik ki, növbəti dəfə zərbələrimiz qolla nəticələnsin.
– Bu məğlubiyyəti necə tez unutmaq olar?
– Çox tez toparlanmalıyıq. Diqqətimizi “Hradeç Kralove” ilə oyuna yönəldəcəyik. Çempionatla Çempionlar Liqası arasında keçid etməyi öyrənmişik və bu, çox vacibdir. Qarşılaşmalar sıx qrafiklə keçirilir, amma bunun öhdəsindən gəlməliyik.
– “Fənərbağça” ilə növbəti oyuna nəyi götürəcəksiniz?
– Çempionlar Liqasında oyunlar fərqli keçir. Bu gün olduğu kimi, bir hissəni boşa verməməli və qol imkanlarımızdan yararlanmalıyıq. İnanıram ki, bu gün vura bilmədiyimiz qolları gələn həftə üçün saxlamışıq.
– Evdə “Eden” stadionunda dolu tribunalar önündə oynayırsınız. “Fənərbağça” ilə görüşdə də belə olacaq. Bəs Bakıdakı atmosfer necə idi?
– Özünəməxsus və fərqli idi. Digər tərəfdən, meydanda heç nə dəyişmir. Bu, Çempionlar Liqasıdır və bu turnirdə xal qazanmaq üçün çox az imkan olur. Nəticənin niyə istədiyimiz kimi olmadığının səbəblərini tapmalıyıq.
– Rəqibin nisbətən zəif komandalardan biri olması üzərinizdə təzyiq yaratmışdı?
– Düşünmürəm. Bu komandalar turnirə təsadüfən vəsiqə qazanmırlar. Əlbəttə, bilirdik ki, ən böyük klublarla müqayisədə burada şansımız daha çoxdur. Qələbə qazanmaq imkanımızın olduğunu hiss edirdik, amma onu əldən verdik. İndi növbəti oyunlara köklənməli və həmin qarşılaşmalarda uğur qazanmağa çalışmalıyıq.