Portuqaliyanın Portiman şəhərində veteranlar arasında cüdo üzrə Avropa çempionatında qızıl medal qazanan Fərhad Rəcəbli (90 kq) Prosport.Az-a müsahibə verib.
- 12-ci dəfə Avropa çempionu oldunuz. Yarışdan əvvəl də müsahibə verərkən sizdə bir rahatlıq hiss olunurdu. Fikirləriniz maraqlıdır. Bu rahatlıq nədən irəli gəlirdi?
- Yarışdan əvvəl əsas məqsədim dünya və Avropa çempionatlarındakı çempionluqlarımın sayını bərabərləşdirmək, yəni hər iki yarışda 12 dəfə qalib olmaq idi. Şükürlər olsun Allaha, bu hədəfə çata bildim. Rahatlıq dedikdə, bu, illər ərzində çəkdiyim zəhmətin bəhrəsini görməyimlə bağlıdır. Zəhmət çəkməyə davam edirik. İnşallah, Allahın izni ilə qarşıda yenə qələbələrimiz olacaq.
- Sizin üçün hansı görüş daha çətin keçdi?
- Əlbəttə ki, final görüşü daha çətin oldu. Finalda ingiltərəli cüdoçu ilə qarşılaşdım. Onunla ilk dəfə görüşürdüm. O da vaxtilə idmançı olub, hətta 1988-ci ildə Olimpiya Oyunlarında iştirak edib. Bir neçə ildir yenidən idmana qayıdıb, məşq edir. Fiziki cəhətdən çox güclü idi, tutuşları da möhkəm idi. Final görüşü olduğuna görə mübarizə bir qədər ağır keçdi. Amma gördüm ki, güclü olmasına baxmayaraq, o da məndən çəkinir. Arada 1-2 hücum etdim və ona "şido" verdilər. Sonra hücumlarımı davam etdirdim, amma xal qazana bilmədim. 2-ci "şido" da verildi. “Golden Score”a keçdik və orada rəqibə daha bir "şido" verdilər. Beləliklə, fənd etmədən, cərimələr hesabına qalib gəldim. Ağır görüş idi, yaxşı rəqib idi. Onun bu qədər güclü olacağını bilmirdim. Bəlkə də buna görə ona fənd edə bilmədim.
- Avropa Cüdo Birliyinin məlumatında niderlandlı Hendrik Koppenin də veteranlar arasında 12 Avropa çempionluğu olduğu bildirilir. Siz onunla birlikdə rekordçular sırasındasınız. Xüsusi bir hədəfiniz varmı?
- Bəli, Hendriklə liderlər sırasındayıq. Avropa çempionatlarındakı nəticələrimiz, demək olar ki, eynidir – 12-yə 12. Dünya çempionatlarında isə onun 14, mənim 12 çempionluğum var. Bilirsiniz, bu, simvolik bir şeydir. Bu rəqəmlərlə bağlı xüsusi hədəfim yoxdur. Amma yenə də güləşirəm. Əlbəttə, 1-ci olmaq yaxşı olardı. Hər şey qismətdir.
- Komandanın ümumi çıxışı barədə nə deyə bilərsiniz?
- Yarış hələ davam edir. Şəxsi yarışların ikinci günü də artıq başa çatıb. Daha 2 gümüş medal qazanmışıq. 60 kq-da M15 kateqoriyasında Babək Hacıyev, M4 qrupunda isə Elşən Kərimov 2-ci yeri tutdu. 4 cüdoçumuz isə 7-ci oldu.
Bu gün M1 və M2 qruplarında yarışlar keçiriləcək. Daha 4 idmançımız mübarizə aparacaq. İnşallah, onların da müəyyən nəticələri olar. Oktyabrın 25-də isə ne-vaza yarışları keçiriləcək. Bu, sırf parter güləşidir. Həmin yarışda Azərbaycanı Ramil Muradov təmsil edəcək. İnşallah, ondan da nəticə gözləyirik. Hələlik bu qədər.
Cavid