Bu gün kişilər arasında voleybol üzrə "Xilasedici" komandası Çelenc Kubokunda (Challenge Cup) Rumıniyanın paytaxtı Buxarestdə 16 dəfə ölkə çempionu, 2 dəfə Çempionlar Liqasının, 3 dəfə də CEV Cup-ın finalçısı olmuş "Styaua"nın qonağı olacaq.

Bakı vaxtı ilə saat 21:00-da başlayacaq oyundan öncə Prosport.Az-ın əməkdaşı baş məşqçi Cəlil Cəlilovdan müsahibə götürüb.

– "Styaua"nı necə analiz etmisiniz?
– Ötən mövsüm Rumıniya çempionatında 5-ci olublar. Bu mövsüm isə komandaya sərmayə yatırıblar. Onlar Balkan çempionatının qalibi olub, ona görə də hazırdırlar. Təəssüf ki, biz də ölkə çempionatında cəmi 1 matç keçirmişik. “Ordu”ya 3:0 qalib gəlmişik. Düzdür, yoxlama matçları keçirmişik. “Gənclər” komandasına 3:0 qalib gəlmişik. Amma oyuna tam hazır deyilik. Yenə də komandamız bu oyuna fokuslanıb. İnşallah, qələbə ilə Vətənə geri dönəcəyik.

– Bu komandanın heyətində kimləri fərqləndirə bilərsiniz?
– Ötən mövsüm bizdə oynayan bolqarıstanlı Svetoslav İvanov hazırda “Styaua”da çıxış edir. Həmçinin, ötən mövsüm “Murov Az-Terminal”da çıxış etmiş belçikalı Sepe Batens da bu komandada oynayır. Bundan başqa, Braziliya, Çexiya və Argentinadan olan legionerləri də var.   

–  Niyə çempionatda cəmi 1 matç keçirmisiniz?
– “Azərreyl”lə oyunda voleybolçumuzda zədə olduğu üçün təxirə salınmasını xahiş etdik. Həmin matçı Çelenc Kapdan sonra keçirəcəyik.

– Ötən mövsüm “Xilasedici” debüt etdi, yaxşı da çıxış edirdiniz, ancaq sonda çempion ola bilmədiniz...
– Bəli, ötən mövsümə yaxşı başlamışdıq, “Yaşıl dünya naminə” ölkə Kubokunu qazanmışdıq. Düzdür, çempionatda bəxtimiz gətirmədi, 3-cü yeri tutduq. Problemlərimiz, zədəlilərimiz oldu. Amma bu il komanda yaxşı yığılıb. İnşallah, bu mövsüm çempion olacağıq.

– Çempionatda əsas rəqibiniz kim hesab olunur?
– Konkret komanda adı çəkmək düzgün olmazdı. “Ordu” yaxşı komanda yığıb, “Neftçi” güclənib. “Murov Az-Terminal” da yaxşı oyunçuları heyətinə qatıb. “Azərreyl” də oturuşmuş komandadır. Bu il çətin olacaq.

Səbuhi Musa