"Araz-Naxçıvan" "Neftçi" və "Sabah"dan icarəyə götürülmüş futbolçularını oynada bilmir.
Prosport.Az-ın xəbərinə görə, söhbət hücumçu Ağadadaş Salyanski və müdafiəçi Abdulla Rzayevdən gedir.
"Sabah"dan icarəyə götürülmüş Abdulla Rzayev artıq Premyer Liqanın III turunun avqustun 31-də Qəbələdə keçirilmiş "Sabah"la oyununda heyətdə olmayıb. 24 yaşlı sağ cinah müdafiəçisi noyabrın 28-də Mərdəkan qəsəbəsində keçiriləcək XIII turun matçında da heyətdə yer almayacaq.
Bu gün həmçinin, "Neftçi"nin də eyni xahişlə "Araz-Naxçıvan"a müraciət etdiyi üzə çıxıb. Belə ki, millimizin futbolçusu olan Ağadadaş Salyanski Şamaxıda "Neftçi" ilə oyun üçün heyətə daxil edilməyib. Halbuki, 22 yaşlı Salyanski çempionatda 5 qolla Naxçıvan təmsilçisinin bombardiri, Premyer Liqanın 3-cü ən yaxşı qoleadorudur və son sırada olan "Araz-Naxçıvan"ın əsas qol ümididir.
Qeyd edək ki, klublar arasında bağlanılan icarə müqavilələrində bu, rəsmi formada göstərilmir. Klublar buna şifahi danışıq əsasında əməl etməyə çalışır.
