“Qarabağ”ın futbolçusu Aleksey Kaşşuk Ukrayna mətbuatına müsahibə verib.
Prosport.Az xəbər verir ki, vinger komandanın çıxışı, yığmaya dəvət alması və transfer iddiaları haqqında danışıb.
– “Qarabağ”ın avrokuboklarda “Dinamo” üzərində qələbəsindən sonra sosial şəbəkədə “Həmişə inan” deyə, paylaşım etdiniz. Bu, milliyə dəvət gözləməyinizlə bağlı idi?
– Yığmaya düşmək hər futbolçunun əsas hədəflərindəndir. Özümü sübut etmək üçün şansımın olduğunu bilirdik. Bilirəm ki, çoxları üçün Azərbaycan çempionatından Ukrayna yığmasına dəvət almaq qeyri-adi, hətta, inanılmaz görünə bilər. Lakin yaxşı oynayır, qollar vurursunuzsa, diqqətdən yayınmırsınız.
– “Dinamo”ya qalib gəlmək sizin üçün prinsipial məsələdir?
– Belə deməzdim. Ukrayna klubuna rəqib olanda çox sevindim. Bilirdim ki, məşqçilər korpusu ukraynalı futbolçuları izləyəcək, yaxşı fürsət olduğunu düşünürdüm. İlk oyunda məğlub olsaq da, nəticəni dəyişə bildik. Növbəti mərhələyə vəsiqəni təmin edən qolu vuranda çox sevindim. Əsas odur ki, inanırdım, bilirdim ki, hər şey yaxşı olacaq.
– Mövsüm “Dinamo”da olduğu kimi sizdə də uğurlu keçmədi. Komanda uzun illərdən sonra ilk dəfə avrokuboklardan kənarda qaldı...
– Düzdür, bu, hamımız üçün çətin oldu. “Qarabağ” Azərbaycan üçün vacib məsələdi. Futbol arenasında bu klub ölkəni çox yaxşı tanıdıb. Yayda heyətdə ciddi dəyişikliklər oldu və yenilərin vaxta ehtiyacı var idi. Bu da avrokubokların təsnifat mərhələlərinə təsadüf etdi. Yavaş-yavaş formamızı bərpa edirik. Turnir cədvəlində bir az geridəyik, amma hələ qarşıda uzun marafon var.
– Yayda sizin də klubdan ayrılacağınız iddia edilirdi. “Polesye”yə keçidiniz gündəmdə idi?
– “Qarabağ”dan ayrılmağı düşünürdüm. Klubla danışdım, növbəti addımı atmağa hazır idim. Lakin sonra vəziyyət dəyişdi və hiss etdim ki, məşqçimiz mənə çox güvənir. Hazırda burada xoşbəxtəm. Gələcəkdə necə olacağını Tanrı bilir.
