"Yaxşı oyun alındı. Prinsipcə, matçda diqtə edən tərəf idik, qol epizodlarımız da çox idi. Əsas odur ki, qələbə qazandıq. Azarkeşlərə sevinc bəxş etdik".

Prosport.Az xəbər verir ki, bu sözləri "Qarabağ"ın qolkiperi Andrey Lunyov Avropa Liqasının qrup mərhələsinin ilk turunun "Molde" ilə oyunundan sonra jurnalistlərə açıqlamasında deyib. Rusiyalı qapıçı jurnalistlərin suallarını cavablandırıb. 

– Öz performansınızı necə dəyərləndirirsiniz?
– Açığı, mənimlə bağlı epizod çox yox idi. Ümumi götürsək, normal alındı. Uzun müddət rəsmi matçlarda meydana çıxmamışdım. Fasilə yaranmışdı. Ümidvaram ki, oyundan-oyuna daha yaxşı olacaq.

– Sizcə, daha çox qol vurmaq üçün nə çatmadı?
– Demək çətindir. Yəqin ki, hardasa konsentrasiya, hardasa tez qərar vermək çatışmadı. "Molde"nin qolkiperi də yaxşı oynadı. Bir neçə dəfə komandasını qoldan xilas etdi.

– "Molde"nin bu cür oynayacağını gözləyirdiniz?
– Rəqibi yaxşı analiz etmişdik, necə oynadıqlarına baxmışdıq. Prinsipcə, təəccüblü heç nə yox idi. Bizim komanda yaxşı oynadı. 

– Şahruddin Məhəmmədəliyev daha çox ötürmələrlə topu oyuna daxil edirdi. Amma siz topu irəliyə vurursunuz. Baş məşqçinin tapşırığı idi, yoxsa özün belə oynayırdınız?
– Öz istəyimlə olsaydı, yəqin ki, topu götürüb, irəli qaçardım (gülür). Məşqçilər korpusunun tapşırığı idi.

– "Qarabağ"a "Bayer"dən gəlmisiniz. O komanda da bu qrupda var...
– Onlar fərqli futbol oynayır. Hər komandanın öz sistemi var. 

– "Qarabağ"ın qrupdan çıxmaq şanslarını necə dəyərləndirirsiniz?
– Əgər bu cür intizamlı, peşəkarcasına oynasaq, şanslar yaxşıdır. Hər şey özümüzdən asılıdır.