Azərbaycan cüdoçusu Kənan Nəsibov (+100 kq) Zaqrebdə keçirilən Qran-pri turnirində qızıl medal qazanıb.
Prosport.Az xəbər verir ki, o, final görüşündə Afrika əsilli Almaniya təmsilçisi Losseni Koneyə qalib gəlib.
Bu qələbə Kənan Nəsibova karyerasında Dünya Turu turnirlərində 3-cü titulunu (ötən il də Zaqreb Qran-prisində qızıl medal qazanmışdı, həmçinin bu il Daşkənddə "Böyük Dəbilqə"nin qalibi olmuşdu) qazandırıb, həmçinin Losseni Kone ilə şəxsi qarşılaşmalarda 2:1 hesabı ilə önə keçməsinə imkan verib.
Uşanqi Kokauri isə yarımfinalda zədələndiyi üçün bürünc medal görüşünə çıxmayıb və Zaqreb Qran-prisini 5-ci pillədə tamamlayıb.
Beləliklə, Azərbaycan bu yarışı 2 qızıl medalla başa vurub.
21:03
Azərbaycan cüdoçusu Kənan Nəsibov (+100 kq) Xorvatiyanın paytaxtı Zaqrebdə keçirilən Qran-pri turnirinin finalına vəsiqə qazanıb.
Prosport.Az xəbər verir ki, ilk mərhələdən azad olan idmançımız ardıcıl olaraq qazaxıstanlı Jantilek Nurtillepulı, fransalı Tyeman Diabi və gürcüstanlı Saba İnaneişvilini məğlub edib.
Kənan Nəsibov qızıl medal uğrunda həlledici görüşdə Almaniya təmsilçisi Losseni Kone ilə qarşılaşacaq.
Eyni çəki dərəcəsində mübarizə aparan digər Azərbaycan cüdoçusu Uşanqi Kokauri də yarımfinala qədər irəliləyib. O, serbiyalı İqor Vraçar və qazaxıstanlı Yerasıl Kajıbayevi məğlub etsə də, yarımfinalda Losseni Koneyə uduzub.
Uşanqi Kokauri bürünc medal uğrunda görüşdə ukraynalı Yevgeni Baliyevski ilə üz-üzə gələcək.
Xatırladaq ki, daha əvvəl Azərbaycanın digər təmsilçisi Gültac Məmmədəliyeva 52 kq çəki dərəcəsində bürünc medal qazanıb.
