Rusiyanın “Dinamo Moskva” klubunun sabiq qapıçısı Aleksandr Uvarov SSRİ çempionatları dövründə danışılmış oyunlarla bağlı xatirələrini bölüşüb.

Prosport.Az xəbər verir ki, veteran qolkiper “Sport-Ekspress”ə müsahibəsində 1988-ci ildə Bakıda “Neftçi” ilə keçirdikləri qarşılaşmadan sonra eşitdiyi söhbəti də açıqlayıb.

O, 1988-ci ildə Bakıda keçirilmiş oyunda iştirak etməyən əsas qapıçı Dmitri Xarinin əvəzinə meydana çıxdığını bildirib. Uvarovun sözlərinə görə, qarşılaşma zamanı İskəndər Cavadov ayağına güclü zərbə endirib və o, matçı çətinliklə başa vurub. Buna baxmayaraq, qapısını toxunulmaz saxlayıb.

Həmin görüşdə Moskva “Dinamo”su 1:0 hesabı ilə qalib gəlib. Yeganə qolu 34-cü dəqiqədə İqor Dobrovolski penaltidən vurub.

Maraqlıdır ki, 1988-ci il mövsümünün sonlarına yaxın keçirilən bu qarşılaşmada “Neftçi” güclülər dəstəsində yerini qorumaq uğrunda mübarizə aparırdı və xallara ehtiyacı var idi. Lakin sonda 16 komanda arasında 15-ci yeri tutan Bakı klubu I Liqaya enib.

Uvarov qalib gəldikləri oyundan sonra baş verən hadisəni belə xatırlayıb: “‘İnturist’ hotelinə qayıdırdıq. Liftlərin yanında masalar vardı, iki qəribə adam oturmuşdu. Ayaqlarının yanında diplomat vardı. Mənə işarə edərək dedilər: "Bax, pul vermək lazım olan adam bu idi". Öz-özümə düşündüm ki, bu nə məsələdir? Mən belə məsələlərdə sadəlövh idim”.

Uvarov müsahibəsində danışılmış oyunlarla bağlı başqa bir hadisəyə də toxunub. O, 1982-ci ildə Moskva “Dinamo”sunun doğma meydanda Minsk “Dinamo”suna 0:7 hesabı ilə uduzduğu qarşılaşmanın danışılmış oyun olduğunu yalnız illər sonra öyrəndiyini söyləyib.

Sabiq qapıçının sözlərinə görə, həmin vaxt komandaya Minsk təmsilçisinə kömək etmək təklif olunub. Lakin o, belə oyunlarda iştirak etməyəcəyini və öz qapısına qol vurmayacağını bildirib.

Uvarov həmin qarşılaşmada baş verənlərdən şübhələnmədiyini, Minsk komandasının üstün oyun nümayiş etdirdiyini düşündüyünü vurğulayıb. Danışılmış oyun barədə həqiqəti öyrənəndə isə şoka düşdüyünü etiraf edib.