"Bu gün bəzi oyunçularımız hazır deyildi. Bu səbəbdən əsas heyət üzvlərinə dincəlmək üçün şans verə bilmədik. Təbii ki, mövcud vəziyyətdə basketbolçularımız oyun boyu yüksək sürəti qoruyub saxlamaqda çətinlik çəkdilər. Ötürmələrdə və atışlarda bəsit səhvlərə yol verdik".

Prosport.Az xəbər verir ki, bu sözləri "Neftçi” basketbol klubunun baş məşqçisi Konstantinos Vasiliadis FIBA Avropa Kubokunun G qrupunda Latviyanın VEF komandasına 94:110 hesabı ilə uduzduqları oyundan sonra deyib.

Yunanıstanlı mütəxəssis bildirib ki, belə qarşılaşmalarda düzgün qərar vermək üçün tələsməmək lazımdır: "Müsbət məqam odur ki, bu sürətlə oynaya biləcəyimizi nümayiş etdirdik. Digər vacib bir məqama da toxunmaq istəyirəm: bu gün yerli oyunçularımız şans qazandılar. Azərbaycanlı basketbolçular istedadlıdırlar və oynamağa böyük həvəsləri var. Lakin daha çox çalışmalıdırlar. Xaricdə uşaqlar artıq 5-6 yaşlarından basketbolla məşğul olmağa başlayırlar. Milyonlarla uşaq arasından milli komandaya cəmi 5 nəfər seçilir. 14 yaşından bu idmana başlayan şəxs, 6 yaşından məşğul olan biri qədər basketbolun sirlərinə dərindən yiyələnə bilməz. Mən bu sahədəki biliklərimi və xaricdə qazandığım təcrübəni bölüşməyə hər zaman hazıram".