"Pis başlamadıq, amma tələsdik. Hesabda bir qədər önə keçdikdən sonra rəqibin özgüvəni artdı. Biz də zədədən yeni dönən Arnes Sakenis ilə pis oynamadıq. Lakin o, tam hazır olmadığı üçün istədiyimiz kimi istifadə edə bilmədik. Məhz onu parketdən aldığımız hissədə bir qədər çətinlik çəkdik. Sonra yaxşı müdafiə olunduğumuz bir hissə oldu. Həmin vaxt xal fərqini yenidən 10-a sala bildik. Lakin bundan artığını edə bilmədik".

Prosport.Az xəbər verir ki, bu sözləri "LANDAU Layns" klubunun baş məşqçisi Ərhan Tokər FIBA Avropa Kubokunun G qrupunda Slovakiyada "Prievidza"ya 84:108 hesabı ilə uduzduqları II tur oyunundan sonra deyib.

Türkiyəli mütəxəssis məğlubiyyəti şərh edib: "Bu, çox ağır səfərdir. Azarkeşlər çılğındırlar və rəqibə təzyiq göstərməyi bacarırlar. Eyni təzyiqi hakimlər də hiss edirlər. Burada oynamaq asan deyil. Xal fərqi böyük oldu, amma mənə görə, “Cenevrə” ilə oyun daha pis keçmişdi.

Nəticədə məğlub olduğumuz üçün üzgünük. Çətin dönəmdən keçirik. Ardıcıl ağır oyunlar oynayırıq və heyət baxımından çətinliliyimiz var. Zədəli oyunçularımız tam formalarını bərpa etdikdən sonra daha yaxşı olacağımıza və əsl gücümüzü göstərəcəyimizə inanırıq".