Zambiya mətbuatında bu ölkənin xaricdə çıxış edən futbolçuları barədə maraqlı məqalə dərc edilib.

Prosport.Az xəbər verir ki, legioner həyatı yaşayan zambiyalıların cari mövsümün startındakı performans araşdırılıb. Onların arasında karyerasını “Kəpəz”də davam etdirən hücumçu Kennet Kalunqa da var.

Yazıda Gəncə klubunun Azərbaycan Premyer Liqasının VII turunda “Araz-Naxçıvan”ı səfərdə 2:0 hesabı ilə məğlub etdiyi və 29 yaşlı forvardın matçı əvəz edilmədən keçirdiyi qeyd olunub.

Vaxtilə Zambiyanın U-20 yığmasında çıxış edən Kalunqanın Azərbaycan çempionatında özünü yaxşı tərəfdən göstərəcəyi təqdirdə əsas milliyə çağırılması da istisna edilməyib.

Qeyd edək ki, bu ilin yayından “Kəpəz”in formasını geyinən Kennet Kalunqa ötən mövsüm I Liqada “Mingəçevir”in heyətində çıxış edib.