"Düşünürəm ki, ilk hissədə, xüsusilə də 15 dəqiqədə görmək istədiyimiz "Neftçi"ni meydanda gördük. Biz yeni komandayıq və cəmi 20 gündür birlikdə işləyirik. Bu müddət ərzində təxminən 15 məşq keçmişik. Ona görə də həm komandaya, həm də oyunçulara bir-birlərinə uyğunlaşmaq və istədiyimiz basketbolu oynamaq üçün vaxt lazımdır".

Prosport.Az xəbər verir ki, bu sözləri "Neftçi” basketbol komandasının baş məşqçisi Konstantinos Vasiliadis FIBA Avropa Kubokunun əsas mərhələsində "Mikonos"la oyundan  (58:78) sonra deyib.

Mütəxəssis ilk 15 dəqiqədə çox yaxşı oyun nümayiş etdirdiklərini bildirib: "Müdafiədə yaxşı çıxış etdik, hücumda isə əvvəlki oyunumuzla müqayisədə daha yaxşı təsir bağışladıq. Lakin 2-ci hissədə yenidən oyundan qopduq və eyni səhvləri təkrarlamağa başladıq.

Özümüzə inamımız azaldı. Təxminən 5 dəqiqə ərzində 7 açıq 3-lük atışından yararlana bilmədik, çoxsaylı asan atışları və layapları qaçırdıq. Müdafiədə də yenidən çoxlu səhvlərə yol verdik və lazımi enerjini göstərə bilmədik. Oyunçuların yorulduğunu hiss etdim.

Oyunun gedişatını dəyişmək üçün zona müdafiəsindən və bir neçə başqa variantdan istifadə etməyə çalışdım. Amma enerjiniz yoxdursa, meydanda kifayət qədər hərəkət edə bilmirsiniz. Nəticədə birəbir mübarizələrdə uduzduq və müdafiə ribaundlarında da çoxlu səhvlərə yol verdik".

Onun sözlərinə görə, bu oyunda yeganə müsbət məqam ilk 15 dəqiqədə sərgilənən oyun olub: "Həmin müddətdə əvvəlki oyuna nisbətən nələri daha yaxşı etdiyimizi analiz edəcəyik. Eyni zamanda, 2-ci hissənin bütün 20 dəqiqəsinə yenidən baxıb oyunçularımıza yol verdiyimiz səhvləri göstərəcəyik.

Bununla belə, düşünürəm ki, 3 gün əvvəlki vəziyyətimizlə müqayisədə hazırda daha yaxşı durumdayıq. Əminəm ki, qarşıdakı 3 gün ərzində daha yaxşı olacaq və liqadakı ilk oyuna daha yaxşı hazırlaşacağıq.

Oyunçularla danışmalıyam və əminəm ki, onlar da vəziyyəti anlayırlar. Biz işləməli, detallara daha çox diqqət yetirməli və növbəti oyuna hazır olmalıyıq.

Bu bir marafondur. Bizim qarşımızda uzun bir yol var və bu yolu keçməliyik".