“Araz-Naxçıvan”ın baş məşqçisi Yuri Maksimov “Qəbələ”yə 1:2 hesabı ilə uduzduqları Azərbaycan Premyer Liqasının IX tur matçından sonra mətbuat konfransı keçirib.

Prosport.Az xəbər verir ki, ukraynalı mütəxəssis əvvəlcə oyunu dəyərləndirib.

– Özümüz rəqiblər üçün hədiyyələr hazırlayırıq. Əsas problemimiz odur ki, özümüz qol vurmaqda çətinlik çəkirik, amma çox asanlıqla qollar buraxırıq. Futbolçular çalışırlar, maksimum güclərini ortaya qoyurlar. Səhvlər var. Bu, futboldur. Bəzi hallarda ustalıq səviyyəsi çatmır, bəzi hallarda isə diqqətsizlik edirik.

– Komandanın oyununda hansı dəyişikliklərə ehtiyac var: Mövcud vəziyyətdən çıxış yolunu nədə görürsünüz?

– Bu barədə danışmaq istəmirəm. Hazırkı vəziyyətdə nəyisə dəyişmək çətindir. Problemləri həm 1-ci, həm də 2-ci hissədə görürük. Bəzən qol vururuq, sonra oyunçu dəyişiklikləri edirik, amma sanki gücümüz çatmır ki, nəticəni qoruyaq və ya qələbə qazanaq.

– Bəzi mövqelərdə problemlər olduğu görünür. Zədə və cəzalar səbəbindən futbolçuları öz mövqelərindən fərqli yerlərdə oynatmağa məcbur olursunuz. Bu, oyuna nə dərəcədə təsir edir?

– Bəli, bəzi futbolçularımız zədə və ya qırmızı vərəqə səbəbindən oyunları buraxırlar. Buna görə də müəyyən mövqelərdə başqa futbolçulara şans verməli oluruq. Bu da komandada çətinliklər yaradır.

– Heyətə yeni futbolçular cəlb etmək və ya qış transfer pəncərəsində dəyişikliklər etmək planınız varmı?

– Hazırda yeni transferlər barədə düşünmürük. Mövsüm ərzində zədələrlə bağlı problemlərin olması mümkündür. Amma transfer məsələsi təkcə mənim qərarımdan asılı deyil. Hazırkı vəziyyətdə çox şeyi dəyişə bilmirik.

– Komandanın formalaşdırılması və mövcud heyətin imkanları barədə nə düşünürsünüz? Bu vəziyyətdə mövsümün qalan hissəsi üçün hansı planınız var?

– Hazırda nə edə bilərik ki? Təəssüf ki, çox şeyi dəyişmək imkanımız yoxdur. Mövcud vəziyyəti anlayıram. Bizim işimiz davam etmək, məşq etmək və oyunlara çıxmaqdır. Sadəcə, bu cür səhvlərə yol verməməliyik. Hər oyunda çox asan qollar buraxırıq, qol vurmaq üçün isə xeyli çətinlik çəkirik. Əsas problemimiz də məhz budur.