– Səni məhz “Bukovina” ilə müqavilə imzalamağa nə inandırdı?
– Dediyim kimi, əsas amil məşqçilər korpusunun yanaşması və klubdakı insanların münasibəti oldu. İlk andan hiss etdim ki, məhz bu klubda olmalıyam. Çünki burada məni komandaya gətirmək üçün hər şeyi 100% etdilər. Qərarıma o qədər əmin idim ki, müqaviləni imzaladım. Burada, olmaqdan çox xoşbəxtəm!

– Gizlətməyək, klubumuzun heyətində hazırda milli komandanın futbolçusunu görmək xüsusi hadisədir. Azərbaycan millisində 45 oyun keçirib 7 qol vurmusan. Beynəlxalq təcrübən “Bukovina"ya necə kömək edə bilər?
– Milli komanda ilə klub tamamilə fərqli şeylərdir. Çoxları bunların eyni olduğunu düşünür, amma belə deyil. Milli komandada ölkəni təmsil edirsən, klubda isə hər gün çalışırsan. Mən “Bukovina”da özümün ən yaxşı versiyam olmağa çalışacağam. Milli komandada da eyni şeyi etməyə çalışıram. Əlbəttə, milli komandada güclü yığmalara və yüksək səviyyəli futbolçulara qarşı qazandığım təcrübəni kluba gətirə bilərəm. Milli komandada 90 dəqiqə ərzində yüksək səviyyəli rəqiblərə qarşı konsentrasiyanı qorumağı öyrənirsən. Bu təcrübəni yeni komandama ötürmək və meydanda “Bukovina"nın rəngləri üçün mübarizə aparmaq istəyirəm.

– Beynəlxalq karyeranda xüsusi məqam ötən ilin noyabrında Fransa millisinin qapısına vurduğun qol oldu. Həmin oyunu və qoldan sonrakı hisslərini xatırlayırsanmı?
– Əlbəttə, hər şeyi təfərrüatı ilə xatırlayıram. Oyunun 4-cü dəqiqəsi idi və Fransaya qol vuraraq hesabı 1:0 etdik. Emosiyalar və adrenalin inanılmaz dərəcədə yüksək idi! Amma həmin anda beynimdən dərhal bir fikir keçdi: “Lənət olsun, qarşıda Fransaya qarşı hələ demək olar ki, 90 dəqiqə var!” (gülür.) Mənim üçün bütün qollar xüsusidir. Amma bu qol həqiqətən də unikaldır. Çünki oyun Azərbaycanda keçirilirdi və bu, millinin tarixində Fransanın qapısına vurduğumuz ilk qol idi. Möhtəşəm təcrübə idi və belə bir şey heç vaxt unudulmur.

– Azərbaycan millisində vurduğun digər qollardan hansı sənin üçün daha yaddaqalandır?
– Açığı, hər qol mənim üçün vacib və yaddaqalandır. Çünki ölkən üçün qol vurursan. Ailənizin, köklərinizin bağlı olduğu ölkəni təmsil edirsən. Almaniyada doğulsam da, özümü azərbaycanlı hiss edirəm. Ən yaddaqalan qolum isə Slovakiyaya qarşı oyunda milli komandadakı ilk qolumdur. Həmçinin Fransaya vurduğum qol. Milli komandada 7 qolum arasında bu 2 qolu xüsusi qeyd edərdim. Ümid edirəm ki, bundan sonra onların sayı daha da artacaq.

– Düz 1 il əvvəl Azərbaycan millisinin heyətində Ukraynaya qarşı oynamışdın. O zaman 12 ay sonra bu ölkəyə köçəcəyini təsəvvür edə bilərdinmi?
– Açığı, xeyr. Amma futbolu məhz buna görə sevirəm. Sabah harada olacağını heç vaxt bilmirsən. Bu, həqiqətən də maraqlı təsadüfdür. Ukrayna millisinə qarşı keçirdiyimiz oyunu çox yaxşı xatırlayıram. İndi isə Ukraynada, gözəl sarı rənglərdə çıxış edən bir klubla müqavilə imzalamışam. Bu, həqiqətən də çox gözəldir!

– Almaniyada doğulub böyümüsən. Səni alman mentalitetinə sahib azərbaycanlı futbolçu adlandırmaq olar. Alman futbol mühiti sənin formalaşmağına nə qədər təsir edib?
– Demək olar ki, məni tamamilə formalaşdırıb. 15 yaşımda akademiyaya köçdüm. Orada sənə ciddi nizam-intizam və ağır əmək öyrədilir. Səhər məşq edirsən, sonra məktəbdə təhsil alırsan, yenidən məşqə gedirsən və axşam yenə dərslərin olur. Bu, böyük intizam tələb edirdi. Həmin sistem futbolçu kimi formalaşmağımda çox böyük rol oynayıb.

– Almaniyanın U-17 millisində Kay Haverts ilə bir çox oyun keçirmisən. Həmin dövr haqqında nələri xatırlayırsan?
– O vaxt biz sadəcə uşaq idik və karyeralarımızın necə inkişaf edəcəyini bilmirdik. Gənclər futbolundan zövq alırdıq, Avropa çempionatının seçmə mərhələsində oynayırdıq. Maraqlıdır ki, həmin turnirin seçmə oyunları məhz Azərbaycanda keçirilirdi. Kay Haverts birlikdə oynamağa başladığımız ilk vaxtlardan etibarən əla futbolçu idi. O, inanılmaz karyera qurdu və bunu davam etdirir. Kay həm yaxşı insandır, həm də top səviyyəli futbolçudur. Onunla eyni paltardəyişmə otağını bölüşməyim və eyni səviyyədə çıxış etməyim barədə xoş xatirələrim var.

– Klub karyeran da kifayət qədər zəngindir. Almaniyada “Ayntraxt”, İngiltərədə “Vulverhempton”, həmçinin Portuqaliya, İsveçrə, Türkiyə və Polşa klublarında çıxış etmisən. Klub səviyyəsində ən yaddaqalan və uğurlu dövrün hansı olub?
– Hər hekayənin öz yüksəlişləri və enişləri var. Bu, futbol həyatının normal hissəsidir. Hər ölkədə yeni bir şey qazandım: yeni mədəniyyət, taktiki biliklər, fərqli məşqçilərin təcrübəsi. Karyeramda konkret olaraq bir dövrü ən sevimli hesab etmirəm. Amma İsveçrədə oynamaq mənim üçün çox xoş idi. Orada alman dilində sərbəst danışa bilirdim və bu, adaptasiyamı asanlaşdırırdı. Portuqaliyada da çox gözəl idi. Tanımadığım ölkəyə getdim və cəmi il yarım sonra portuqal dilində sərbəst danışmağa başladım. Hər dövrün həm yaxşı, həm də çətin anları olub. Amma ümumilikdə hər komandada çox yaxşı təcrübə qazandım.

– 20 yaşında dünyanın ən güclü liqalarından birinə – İngiltərə Premyer Liqasına getdin. Lakin “Vulverhempton”la APL-də debüt edə bilmədin. İngiltərədə özünü daha yaxşı göstərmək üçün şansın olduğunu düşünürsənmi?
– Açığı, geriyə baxmağı və “belə olsaydı, necə olardı?” sualları haqqında düşünməyi çox sevmirəm. Mən orada idim, hər gün Premyer Liqa komandası ilə məşq edirdim və həmin səviyyəni içəridən görürdüm. Müəyyən mərhələdə yaranmış vəziyyətə görə icarəyə getdim. Gənc futbolçu idim və mənə oyun praktikası lazım idi. Amma 3-4 il ərzində Premyer Liqa klubunda olmaq mənim üçün möhtəşəm təcrübə idi. Əlbəttə, rəsmi oyunda meydana çıxmaq imkanım olsaydı, bundan imtina etməzdim. Amma tale belə gətirdi.

– Ukrayna Premyer Liqası, Ukrayna futbolu və ölkəmiz haqqında nə bilirdin?
– Ukrayna futbolu haqqında kifayət qədər məlumatım var. Burada hər zaman güclü klublar olub. Bundan başqa, dostlarım Ukraynada oynayıb. Ona görə də çempionatı izləyir və oyunlara baxırdım. Ölkənin özü haqqında da məlumatım var idi. Baxmayaraq ki, əvvəllər yalnız Ukrayna millisinə qarşı oynamışdım. İndi isə burada yaşayacağam. Hazırda gördüklərim mənim çox xoşuma gəlir. Burada həqiqətən hər şey çox gözəldir. Ukraynada olmaqdan səmimi şəkildə zövq alıram. Artıq şəhəri tanımağa başlamışam və deyə bilərəm ki, buranı bəyənirəm. Çox yaxşı şəhərdir.

– “Bukovina”da əsas məqsəd və ambisiyaların nələrdir? Klub azarkeşlərinə hansı mesajı çatdırmaq istəyərdin?
– Əvvəla, burada olduğum üçün çox xoşbəxtəm. Mənim əsas məqsədim komandaya kömək etməkdir. Ümid edirəm ki, komanda da mənə kömək edəcək. Mən hücumçuyam və işim qol vurmaq, komanda yoldaşlarıma assist etməkdir. Azarkeşlərə isə bir söz demək istəyirəm: sizin dəstəyiniz bizim üçün düşündüyünüzdən daha böyük əhəmiyyət daşıyır. Oyunlarımıza gəlin, həm evdə, həm də səfərdə bizi dəstəkləyin. Təcrübəmə əsaslanaraq deyə bilərəm ki, tribunalar öz enerjisini komandaya ötürəndə və futbolçuları bütün oyun boyunca dəstəkləyəndə komanda daha çox qələbə qazana bilir!