"Neftçi" basketbol komandasının baş məşqçisi Konstantinos Vasiliadis FIBA Avropa Kubokunda “Mikonos” üzərində qələbədən (84:80) sonra mətbuata açıqlama verib.

Prosport.Az xəbər verir ki, yunanıstanlı mütəxəssis qalibiyyəti şərh edib:

"Oyuna istədiyimiz kimi başlamadıq, ilk 14 dəqiqədə ləng təsir bağışladıq. Götürdüyümüz taym-autdan və fasilə zamanı etdiyimiz tapşırıqlardan sonra basketbolçular daha diqqətli oynamağa başladılar. Həm atışlarda, həm də ribaundlarda üstünlük qazandıq. Son 2 dəqiqədəki səhvlərə baxmayaraq, düşünürəm ki, bu gün layiqli qələbə əldə etdik.
Fikrimcə, bu gün həm Azərbaycan basketbolu, həm də “Neftçi” üçün qələbə günüdür. Komanda məhz belə gərgin oyunlarda təcrübə toplayır və inkişaf edir".