"İmişli"nin kapitanı Azər Salahlı Azərbaycan Premyer Liqasının XI turunun "Sumqayıt"la oyunundan (0:0) sonra Prosport.Az saytının Yevlaxa ezam olunmuş əməkdaşının suallarını cavablandırıb.

– Ervon Perkinin vaxtında komanda Yevlax şəhər stadionunda məğlub olmayıb. Komandalar sanki burada oynamaqda çətinlik çəkir. Bunun səbəbi süni örtüklü meydança ola bilərmi?
– Öncə onu deyim ki, "Sumqayıt"la oyunun çətin keçəcəyini bilirdik. Çünki uzun müddət idi ki, "Sumqayıt" da Premyer Liqada qələbə qazanmırdı. Ona görə də düşünürdük ki, onlar da Yevlaxa 3 xal üçün gəlib. Qələbə üçün əlimizdən gələni etdik. Təəssüf ki, hesabı açıb qələbə qazana bilmədik və 1 xalla kifayətlənməli olduq. Deyə bilərik ki, bu oyunun ədalətli nəticəsi elə 1 xal idi. Sualınıza gəlincə, bu meydançada oynamaq bir az çətindir. Süni örtüklü meydança olduğundan, futbolçular özlərini zədədən qoruyur. Biz hər oyuna qələbə üçün çıxırıq. Düşünürəm ki, Yevlaxda uduzmamağımız bizim üçün yaxşı nəticədir.

– Bəxtiyar Həsənalızadə oyundan 1 gün əvvəl zədələndi. Bu səbəbdən müdafiə xəttində Mehdi Tahirovu gördük. Müdafiədə fərqliliklər vardımı?
– Bilirsiniz ki, heyətimiz o qədər də geniş deyil. Hər bir futbolçu üçün oynamaq çox vacibdir. Bəxtiyardan başqa, Edvin Banqera da zədəlidir. Düşünürəm ki, heyətimiz komplektləşdikdən sonra hamı daha yaxşı "İmişli" görəcək.

– Milli komanda fasiləsindən sonra burada "Zirə"ni qəbul edəcəksiniz. Bu haqda nə deyə bilərsiniz?
– O oyuna hələ var. 3 gün istirahət edəcəyik. Daha sonra həmin oyunun hazırlıqlarına başlayacağıq. Həmin matça da maksimum nəticə üçün çıxacağıq. Ələlxüsus ev oyunlarında məğlub olmaq istəmirik.

– Bilirsiniz ki, bu sualı verəcəyəm. Jurnalistlər də Azər Salahlı, Bəxtiyar Həsənalıyev və ya Seyxan Fərəcovun milliyə çağırılmamasından yazır. Yığmaya çağırılmamağınız sizə necə təsir edir?
– Hər milli toplanışından öncə bu suallar olur. Düşünürəm ki, bu haqda yetəri qədər demişəm. Artıq bir söz demək istəmirəm. Bunu qəbullanmıram. Ona görə öz üzərimdə də çalışıram ki, bəlkə milliyə düşdüm.

– Ümumiyyətlə, baş məşqçi Ayxan Abbasovla bu barədə söhbətiniz olub?
– Yox.

Səbuhi Musa