"UFC Fight Night 280" turnirində meksikalı Manuel Toresə nokautla qalib gələn azərbaycanlı MMA döyüşçüsü Rafael Fiziyev mətbuat konfransına çıxıb.

Prosport.Az-ın əməkdaşının da iştirak etdiyi konfransda tanınmış idmançıya aşağıdakı suallar verilib.

– Döyüşə girməzdən əvvəl atanızla danışmışdınız? Əgər belədirsə, xüsusi nə danışmışdınız?
– Atam az danışandır. O mənim üçün həyəcan keçirib, gecələri yatmayıb. Yəqin həftədə 3 qutu siqaret çəkib...

– 2-ci raund çox sürətli alındı. Bu sizin planınız idi? 
– İlk raunddan sonra rəqib barmağı ilə gözümə vurdu. Ondan sonra heç nə görmürdüm. Sol gözümü açanda hər şey bulanıq idi. Lakin dedim bir dənə ona vurum və bu, işə yaradı.

– Bakıda möhtəşəm qələbə, yoxsa 100 minlik bonus yaxşıdır?
– Əlbəttə, ikisi də.

– Tanınmış kikboksçumuz Alim Nəbiyevi sizin yanınızda görürük. Bu, Azərbaycan publikasına hesablanmış addım idi, yoxsa bundan sonra onu sizin yanınızda görəcəyik?
– Alim mənim qardaşımdır. Mən hardayamsa, o da orada olacaq.

– Sizdən başqa, karate üzrə beşqat dünya çempionumuz Rafael Ağayev də var. Ümumiyyətlə, Bakıya gəldiyiniz zaman onunla görüşmüsünüz?
– Onu yaxşı tanıyıram. Rafael bir əfsanədir. Onun karate üslubunu çox bəyənirəm. Təbii ki, onunla görüşmüşük. 

– Etiraf edək ki, sizin UFC-də reytinqdə yüksək yerdə olmağınız və ABŞ-də yaşayan Nazim Sadıxovun UFC-yə düşməsi bu mötəbər yarışı Bakıya gətirdi. Siz Nazimlə birgə gələcək üçün ABŞ-də azərbaycanlılar üçün MMA Akademiyası açmağı düşünmürsünüz?
– Bizim UFC-də Tofiq Musayev, Fərman Həsənov və Tahir Abdullayev də var. Niyə ABŞ-də, elə bunu Azərbaycanda etməyək?! Biz bunu burada edəcəyik.

– 4 azərbaycanlıdan 3-ü qalib gəldi. Uduzan Nazim Sadıxova nə dediniz?
– Onu 2017-ci ildən tanıyıram. O, döyüşəndə mən hazırlıq keçirdim. Onun uduzmağına məyus oldum. Ancaq əminəm ki, o yenidən geridönüş edəcək. Tofiq Musayevi çox sevirəm, o, mənim qardaşımdır. Bir əfsanədir. Çox adam soruşdu ki, niyə onun qələbəsini storidə paylaşmamışam? Gözləyirəm ki, nə vaxt onu görsəm, qucaqlayım.

Səbuhi Musa