Mütləq Döyüş Çempionatının (UFC) Bakıda təşkil olunan turnirinə yekun vurulub.
Prosport.Az xəbər verir ki, Milli Gimnastika Arenasında təşkil olunan yarışda gecənin bütün qarşılaşmaları başa çatıb.
Son olaraq əsas döyüşdə Azərbaycan təmsilçisi Rafael Fiziyev meksikalı Manuel Torreslə üz-üzə gəlib. Yüngül çəkidəki görüşdə Fiziyev rəqibini məğlub edib. O, 2-ci raundun 15-ci saniyəsində Torresə nokautla qalib gəlib.
Bundan başqa, milliyyətcə avar olan Şarabuddin Məhəmmədov (Rusiya) gecənin 2-ci əsas döyüşündə Mişel Pereyranı (Braziliya) hakimlərin yekdil qərarına əsasən məğlub edib.
Beləliklə, UFC-nin Bakıda təşkil etdiyi 2-ci turnir başa çatıb. Paytaxtdakı ilk belə yarış 2025-ci ildə keçirilib. Rafael Fiziyev həmin turnirdə də qələbə qazanmışdı.
Xatırladaq ki, "UFC Fight Night Baku"da Azərbaycan təmsilçilərindən Tahir Abdullayev braziliyalı Cefferson Nasimentonu, Fərman Həsənov ABŞ-dən olan Erik Nolanı məğlub edib. Nazim Sadıxov isə Mateus Kamiloya (Braziliya) uduzub.
22:13
Bakıda keçirilən "UFC Fight Night 280" döyüşündə Nazim Sadıxov məğlub olub.
Prosport.Az-ın xəbərinə görə, ötən il Bakıda qalib gəlmiş Nazim Sadıxov bu dəfə özündən 7 yaş kiçik Mateus Kamiloya (Braziliya) 1-ci raundda texniki nokautla uduzub.
Qeyd edək ki, gecənin əsas döyüşlərində milliyyətcə kumık olan Abus Məhəmmədov (Almaniya) Mixal Olekseyçuka (Polşa) təslimetməyə (gilyotin) əsasən, İkram Aliskerov (Rusiya) Brunno Fereyraya (Braziliya) hakimlərin yekdil qərarına əsasən, Asu Almabayev (Qazaxıstan) Çarlz Consona (ABŞ) təslimetməyə (Suloev stretch) görə qalib elan edilib.
Xatırladaq ki, daha əvvəl turnirin ilkin mərhələsində UFC-də debüt edən Fərman Həsənov Erik Nolana (ABŞ) hakimlərin qərarına əsasən və Tahir Abdullayev Jeferson Nasimentoya (Braziliya) texniki nokauta əsasən qalib olub.
Bundan başqa, ilkin mərhələdə yapon əsilli Jan Matsumoto (Braziliya) Bekzat Almaxandan (Qazaxıstan) hakimlərin yekdil qərarına əsasən, Daniil Donçenko (Ukrayna) Teodor Berqqrendən (İsveç) texniki nokauta əsasən, türk əsilli Kaan Ofli (Avstraliya) Xavyer Reyesdən (Kolumbiya) təslim etməyə əsasən, Nursulton Ruziboyev (Özbəkistan) Andrey Pulyayevdən (Rusiya) texniki təslim etməyə əsasən, Abdul-Rəhman Yəhyayev (Türkiyə) Culius Volkerdən (ABŞ) nokauta əsasən qalib olub. Yəhyayev gecənin ən erkən başa çatan döyüşünə imza atıb. O, 8 saniyəyə rəqibin yumruq zərbəsi ilə məğlub edib.
