Sloveniyanın Maribor şəhərində keçirilən XVII Avropa Gənclər Yay Olimpiya Festivalının (EYOF) cüdo yarışlarında Azərbaycan daha 2 medal qazanıb.

Prosport.Az-ın məlumatına görə, fərdi yarışların son günündə tatamiyə çıxan 2 idmançımız yarışı medalla tamamlayıb.

Belə ki, ən ağır çəkili gənc cüdoçularımız – Aslan Kotsoyev (-90 kq) və Ramazan Əhmədov (+90 kq) müvafiq olaraq qızıl və gümüş medal qazanıb.

Osetin əsilli Aslan Kotsoyev Blin Kuka (Kosovo), Nikita Afanasyev (Latviya), Marko Bojiç (Xorvatiya) və Saba Qvelesianini (Gürcüstan) məğlub edərək qızıl medala layiq görülüb. Bu, oğlan cüdoçularımızın fərdi yarışlarda yeganə qızıl medalı olub. Yeri gəlmişkən, bu çəkidə bürünc medallardan birini Azərbaycan əsilli İsveç təmsilçisi Emil Cəbiyev qazanıb.

Ramazan Əhmədov isə Kristian Vilhelm (Almaniya), Yoannis Kostelidis (Yunanıstan) və Stefan Koviniçi (Monteneqro) məğlub etsə də, finalda İbrahim Tataroğlu (Türkiyə) ilə bacarmayaraq, gümüş medalla kifayətlənib. Beləliklə, oğlan komandamız 81 kq istisna olmaqla, qatıldığı 7 çəki dərəcəsində medal qazanmağı bacarıb.

Xatırladaq ki, daha əvvəl qızlarda Vüsalə Hacıyeva (-48 kq), Xədicə Qədəşova (-52 kq) qızıl, oğlanlarda Süleyman Şükürov (-73 kq) gümüş, Nihad Məmişov (-50 kq), Ayxan Mirzəzadə (-55 kq), Məhəmməd Musayev (-60 kq) və Cəsur İbadlı (-66 kq) bürünc medal qazanıb. Son gündəki nəticədən sonra Azərbaycan (3-2-4) medal sıralamasında Gürcüstanı (3-2-1) qabaqlayıb.

Qeyd edək ki, sabah EYOF-da cüdo üzrə qarışıq komanda yarışı keçiriləcək.