“Sərhədçi”nin basketbolçusu Xari Bordvey klubun mətbuat xidmətinə müsahibə verib.

Prosport.Az həmin müsahibəni təqdim edir:

– "Sumqayıt" üzərində qazanılan qələbəni necə qiymətləndirərdiniz?
– Oyunun əvvəlində çətinliklər yaşadıq. Lakin matç ərzində məşqçilər korpusunun etdiyi düzgün dəyişikliklər sayəsində həm hücumda, həm də müdafiədə öz oyunumuzu tapdıq və yaxşı temp yaxalaya bildik.

– Sizcə, bu qələbə seriyası davam edəcəkmi?
– İnanıram ki, bu qalibiyyət seriyasını davam etdirə bilərik. Oyunun əvvəlindən sonuna qədər komanda kimi çıxış etdik və işlər istədiyimiz kimi getməyəndə belə, soyuqqanlılığımızı qoruduq. Sadəcə bu yanaşmanı davam etdirməliyik.

– Turnir cədvəlində daha yuxarı pillələrə qalxmaq mümkün olacaqmı?
– Hazırda əsas diqqətimiz öz potensialımıza uyğun oynamaq və qələbələr qazanmaqdır. Biz hər oyuna ayrı-ayrılıqda yanaşırıq.

– Azərbaycan Basketbol Liqasının səviyyəsi haqqında fikirləriniz necədir?
– Azərbaycan Basketbol Liqası həm A, həm də B qrupunda güclü rəqabətin olduğu bir liqadır. Bu liqada ilk mövsümümdür və açığı, hər anından zövq alıram.

– Sizcə, “Sərhədçi” komandası yüksək liqadakı yerini qoruya biləcəkmi?
– Düşünürəm ki, hər oyuna ayrı fokuslanmağa davam etsək və bacardığımız kimi mübarizə aparsaq, bunu mütləq bacararıq.

– Azərbaycanda yaşamaq sizin üçün çətindirmi? Bakı haqqında düşüncələriniz nələrdir?
– Azərbaycanda yaşamaq mənim üçün çətin deyil. Çox gözəl ölkədir və insanlar çox mehribandır. Mədəniyyətə yaxından tanış olmağa çalışıram, İçərişəhəri də ziyarət etdim və bu, mənim üçün çox gözəl təcrübə oldu.

– Azərbaycan mətbəxini bəyənirsinizmi?
– Mətbəxiniz yüksək səviyyədədir! Hələ ki, bəyənmədiyim bir yemək olmayıb və düşünmürəm ki, olsun. Mütləq bir neçə resepti özümlə aparmalıyam ki, evdə ailəm də dada bilsin.