Azərbaycan komandası Mariborda keçirilən XVII Avropa Gənclər Olimpiya Festivalında ilk medallarını qazanıb.

Prosport.Az xəbər verir ki, komandamızın aktivinə medalları cüdoçularımız yazdırıb. Belə ki, festivalın bu gün start götürən cüdo yarışlarında 3 cüdoçumuz tatami üzərinə çıxıb ki, onlardan da 2-si çıxışını bürünc medalla başa vurub.

Təmsilçilərimizdən ilk olaraq Nihad Məmişov (-50 kq) fəxri kürsüdə yer alıb. Mübarizəyə ermənistanlı Hayk Darbinyan üzərində qələbə ilə başlayan idmançımız növbəti mərhələdə Şota Baçaşvili (Gürcüstan) ilə qarşılaşıb. Təəssüf ki, idmançımız bu görüşdə rəqibinə uduzub. N.Məmişov 3-cü yer uğrunda görüşdə italiyalı Françesko Krokiani ilə qarşılaşıb. Gərgin mübarizə şəraitində keçən görüşdə rəqibinə qalib gələn Nihad Məmişov Maribor-2023-ün bürünc medalına sahib çıxıb.

Komandamıza digər bürünc medalı isə Ayxan Mirzəzadə (-55 kq) qazandırıb. O, 1/8 finalda isveçli cüdoçu Samir Pabloskiyə, növbəti mərhələdə isə niderlandlı Luka Riçardsona qalib gəlib. Lakin idmançımız yarımfinalda gürcüstanlı cüdoçu Merabi Samadaşviliyə məğlub olub. Yeniyetmə cüdoçumuz bürünc medal uğrunda görüşdə polşalı Yan Kolondraya qalib gələrək 3-cü yerə sahib çıxıb.

Qızların mübarizəsində isə Məryəm Bayramzadə (-44 kq) çıxışını medalsız başa vurub. İlk görüşdə Böyük Britaniya təmsilçisi Eva Evinqə qalib gələn Məryəm növbəti mərhələdə belçikalı Lena Antuana məğlub olub. Mübarizəsini təsəlliverici görüşdə davam etdirən cüdoçumuz bu mərhələdə erməni əsilli Avstriya təmsilçisi Tatevik Minasyanla qarşılaşıb. Təəssüf ki, idmançımız bu qarşılaşmada da məğlub olaraq 7-ci yerlə kifayətlənib.

Qeyd edək ki, cüdo üzrə yığma komandamız yarışda 12 (8 oğlan, 4 qız) cüdoçu ilə təmsil olunur.

Onu da bildirək ki, bu nəticədən sonra Azərbaycan medal sıralamasında 16-cı sırada qərarlaşıb. 1-ci sırada İspaniya (2 qızıl, 1 bürünc), 2-ci yerdə Gürcüstan (2 qızıl) və 3-cü pillədə İtaliyadır (1 qızıl, 4 gümüş, 1 bürünc).