Şimali Makedoniyanın və Xorvatiyanın birgə ev sahibliyi etdiyi Skopye-2025 XVIII Avropa Gənclər Olimpiya Festivalına (EYOF) yekun vurulub.

Prosport.Az xəbər verir ki, Avropanın 50 ölkəsindən 4 mindən çox idmançının iştirak etdiyi Skopye-2025-də 14-18 yaş arası idmançılar 15 idman növü üzrə mübarizə aparıb.

Festivalda Azərbaycan komandası ümumilikdə 10 idman növündə 52 (28 oğlan, 24 qız) idmançı ilə təmsil olunub. Azərbaycan idmançıları yarışı 10 (3 qızıl, 3 gümüş, 4 bürünc) medalla başa vurub.

Komandamıza qızıl medalları cüdoçular Gülşən Hüseynova (44 kq), Rza Xəlilli (50 kq) və Rəsul Əlizadə (55 kq) qazandırıb. Cüdo üzrə Nuranə Hacızadə (48 kq), Zeyd Ələsgərov (60 kq) və güllə atıcılığı üzrə Leyli Əliyeva – Oleq Kerjankin dueti (10 metr pnevmatik tapança) gümüş medal əldə edib. Bürünc medalları isə cüdoçular Aysun Məmmədova (52 kq), Məhəmməd Ağakişiyev (73 kq), Sübhan Axundov (+90 kq) və taekvondoçu Yunis Hüseynov (73 kq) qazanıb.

Komandamız bu nəticə ilə ümumi medal sıralamasında 16-cı yeri tutub.

Qeyd edək ki, 50 (19 qızıl, 19 gümüş, 12 bürünc) medal qazanan İtaliya komandası festivalın qalibi olub. Fransa 15 qızıl, 18 gümüş, 5 bürünc medalla 2-ci olub. 3-cü pillədə isə aktivində 33 (10 qızıl, 11 gümüş, 12 bürünc) medal olan İspaniya qərarlaşıb. Türkiyə 26 (10 qızıl, 7 gümüş, 9 bürünc) medalla 4-cü, Böyük Britaniya isə 22 (10 qızıl, 7 gümüş, 5 bürünc) medalla 5-ci olub.

Festivalda 40 ölkənin komandası müxtəlif əyarlı medallar qazanıb. Cəmi 35 ölkə isə festivalda qızıl medal sevinci yaşayıb.