Ukraynanın “Metallist 1925” klubunda çıxış edən Ramik Hacıyevin milliləşdirilməsi məsələsi gündəmdən düşmür.

Prosport.Az Ukrayna mətbuatına istinadən xəbər verir ki, AFFA 21 yaşlı vingeri Azərbaycan millisinə cəlb etməkdə israrını davam etdirir.

Futbolçu özü də millinin skautunun bir neçə dəfə onunla əlaqə saxladığını etiraf edib. O bildirib ki, AFFA tərəfi vətəndaşlıqla bağlı problemlərin həllini öz üzərinə götürüb və bu baxımdan heç bir çətinlik yaşanmayacaq.

Ukrayna KİV-i AFFA-nın Ramik Hacıyevi əsas millinin növbəti təlim-məşq toplanışına cəlb etmək niyyətində olduğunu da vurğulayıb. Lakin gənc oyunçu özü hələ də gələcəyini Ukrayna yığmasında görür. O hesab edir ki, Ukrayna millisi daha böyük perspektiv vəd edir. Bu səbəbdən onu Azərbaycan yığmasına gətirməyə razı salmaq heç də asan görünmür.

Qeyd edək ki, Ramik Hacıyev Ukraynanın U-21 yığmasının üzvüdür. O, cari mövsüm klubunun heyətində keçirdiyi 12 oyunda 4 qol vurub, 5 məhsuldar ötürmə verib.