Azərbaycan Basketbol Liqasında NTD-ni 100:80 hesabı ilə məğlub edən "Gəncə"nin baş məşqçisi Murad Dikmen matçdan sonra açıqlama verib.

Prosport.Az xəbər verir ki, mütəxəssis maraqlı mübarizə izləndiyini bildirib:

"Oyuna və mübarizəyə görə hər iki komandanı təbrik edirəm. Azarkeşlər üçün zövqlü matç oldu. Belə oyunlar həmişə çətin keçir, çünki 3 gün öncə Avropa Kubokunda ağır görüşümüz var idi və hazırlaşmağa vaxtımız az idi. Hamının fikri Rumıniyada keçirəcəyimiz növbəti görüşdədir. Ona görə belə oyunlarda basketbolçuları konsentrasiya etmək çox çətin olur. İlk dövrəni yaxşı oynamadıq, amma fasilədə bəzi şeyləri müzakirə edib lazım olanları yoluna qoyduqdan sonra vəziyyəti dəyişdik. Çox yaxşı çıxış etdik, oynamaq istədiyimiz kimi mübarizə apardıq".

Baş məşqçi son periodda rotasiyalara əl atdıqlarını da qeyd edib:

"Son periodda matça nəzarət bizdə olduğu üçün qarşıdakı səfər matçını da düşünərək rotasiyalar etdik və təzyiqi azaltdıq. Nəticədə qalib gəldik. Bura gəldiyim hələ 1 həftə deyil, 5 gündə iki oyun keçirdik. Komanda ilə bir-birimizə alışmağa başladıq".

Dikmen heyətdəki zədə problemlərinə toxunaraq yerli oyunçuların rolunu vurğulayıb:

"Kapitanımız və oyunqurucumuz Carvis Qarret, həmçinin digər zədəlilərimiz var idi. Risk edib onları oynatmadıq. Ona görə bütün yük yerli oyunçuların üzərinə düşdü. Onları təbrik edirəm, üzərlərinə düşəni etdilər. Biz yaxşı komandayıq, hədəflərimiz böyükdür və daha da yaxşı olacağıq".