Azərbaycan Basketbol Liqasında "Sumqayıt"ı 100:85 hesabı ilə məğlub edən "Sabah"ın baş məşqçisi Lazar Spasiç oyundan sonra mətbuat konfransında iştirak edib.

Prosport.Az xəbər verir ki, mütəxəssis matçın böyük hissəsində üstün olduqlarını, lakin son dəqiqələrdəki çıxışdan narazı qaldığını bildirib:

"Oyuna nəzarət edirdik və böyük xal fərqi ilə öndə idik. Ümumilikdə komandanın çıxışından razı qalsam da, son 8 dəqiqədəki oyundan narazı qaldım. İndi "Ordu" ilə matça hazırlaşacağıq. Avrokubok və daxili çempionat fərqli səviyyələrdir, hələ bu keçidə tam uyğunlaşa bilməmişik. "Nanter"lə oyundan sonra "Sumqayıt"la qarşılaşmaq tamamilə başqa müstəvidir".

Spasiç yeni transfer Orxan Hacıyevin performansını yüksək qiymətləndirib: "O, meydanda olanda xal fərqində də bu hiss olundu. Qələbədə böyük əməyi var, onun çıxışından çox razıyam".

Serbiyalı baş məşqçi son dəqiqələrdə fərqin azalmasını az şans kazanan basketbolçuların zəif oyunu ilə əlaqələndirib:

"Məsələ yorğunluq deyil. Az şans alan oyunçulara imkan verdim, lakin özlərini doğrultmadılar. Daha məsuliyyətli olmalıdırlar".

Spasiç komandanın son vaxtlardakı yüksəlişini də vurğulayıb:

"Oyundan-oyuna daha yaxşılaşırıq, müəyyən müsbət dəyişikliklər var. Son matçları uğurlu keçiririk. Bu oyun da bizim üçün yaxşı bir dərs oldu".