“Matça pis başladıq. İkinci hissədə toparlanmağa çalışdıq. Rəqib bizi daim təxribata çəkməyə çalışırdı. Təəssüf ki, hakimlər də bunu görmədilər".

Prosport.Az xəbər verir ki, bu sözləri “LANDAU Layns”ın baş məşqçisi Ərhan Tokər Azərbaycan Basketbol Liqasının V turunda “Neftçi”ya 84:86 hesabı ilə uduzduqları oyundan sonra deyib.

Mütəxəssis onların hansısa tərəfi tutduğunu düşünmədiyi qeyd edib:

"Sadəcə bu təxribatları qeydə almadılar. Nəticədə Ceyms Freyzer meydandan qovuldu. O, danışmamalı idi, danışdı və oyundan kənarlaşdırıldı. Bu da vəziyyətimizi bir qədər çətinləşdirdi. Freyzer bizim üçün vacib oyunçudur. Matçın sonlarına doğru oyuna qayıtmağa çalışdıq, lakin qələbə qazana bilmədik. Oturub danışacaq, səhvlərimizi təhlil edəcəyik. İkinci hissədə nələri düzgün etdiyimizi də bilirik. Hər oyuna yüksək motivasiya ilə çıxmaq lazımdır. Bəlkə də əvvəlki matçın təsiri ilə bu gün komandamızın motivasiyası aşağı idi. Sonradan toparlanmağa çalışdıq, amma həmin vaxt rəqib artıq oyuna köklənmişdi və vəziyyəti dəyişmək çətinləşdi. Qalib gələn komandanı təbrik edirəm”.