“Neftçi” basketbol komandasının baş məşqçisi Konstantinos Vasiliadis “LANDAU Lions” üzərində qazanılan qələbədən (86:84) sonra klubun mətbuat xidmətinə açıqlama verib:

Prosport.Az xəbər verir ki, təcrübəli məşqçi oyunun çox maraqlı və gərgin keçdiyini bildirib:

"Hesab edirəm ki, matçın 30 dəqiqəsi ərzində üstünlük tamamilə bizim tərəfimizdə idi.

Görüşün ilk dəqiqələrindən mübarizəyə hazır idik və müdafiədə inamlı çıxış etdik. Rəqib komandanın üzvü Freyzer çox güclü basketbolçudur. Onun heyətdə nə qədər mühüm rol oynadığını bilirdik və qarşısını almağı bacardıq. Bütün oyunçularımız müdafiədə fədakarlıq göstərərək bir-birlərinə kömək etdilər. Çünki yaxşı müdafiə uğurlu hücumun əsas rəhnidir.

İlk periodu yüksək səviyyədə keçirdik və dördüncü rübə qədər oyuna nəzarət etdik. Lakin sonradan yol verdiyimiz bəzi kiçik səhvlər və rəqibin fəallaşması nəticəsində onlar hesab fərqini minimuma endirə bildilər. Unutmaq olmaz ki, qarşımızda çox güclü rəqib var idi.

Son hücum şansı bizdə idi və düzgün qərar verdik. Komandamızda çoxlu istedadlı basketbolçular var və onların hər biri həlledici xal qazanmaq bacarığına malikdir. Şübhəsiz ki, bu gün meydanda daha yaxşı çıxış edən tərəf biz idik.

Oyunçularıma və komandama görə çox sevinirəm. Son vaxtlar zədələr, yorğunluq, sıx təqvim və ardıcıl səfərlər səbəbindən ciddi çətinliklərlə üzləşmişik. Buna baxmayaraq, çox vacib bir qələbə qazandıq.

Bu gün qələbənin sevincini yaşayacaq, sabah isə istirahət edəcəyik. Bazar ertəsindən yenidən məşqlərə başlayırıq. Çünki Bolqarıstanda bizi növbəti oyun gözləyir. Məqsədimiz həmin qarşılaşmada da rəqabətədavamlı çıxış etmək və meydandan qələbə ilə ayrılmaqdır”.