Azərbaycan millisinin futbolçusu Mahir Emreli UEFA Millətlər Liqasının III turunda səfərdə Estoniyaya 1:3 hesablı məğlubiyyətdən sonra "Misli"nin dəstəyi ilə Tallinə ezam olunmuş jurnalistlərə müsahibə verib. Prosport.Az həmin müsahibəni təqdim edir:
– Mahir, öncə oyunla bağlı fikirlərinizi öyrənək...
– İlk hissəni yaxşı oynadıq. Epizodlardan da istifadə etsəydik, fərqli olardı. 2-ci hissəyə isə çox pis başladıq. Bəlkə bunun bir səbəbi də 2-ci qolu tez buraxmağımız idi. Hər halda, bu cür məğlubiyyət üzücüdür. Ümid edirəm ki, bu oyundakı səhvlərimizdən daha yaxşı nəticə çıxarıb növbəti matçda yaxşı nəticə əldə edərik.
– Məğlubiyyətə əsas səbəb kimi nəyi görürsünüz?
– Qəti cavab vermək çox çətindir. Rəqibin qollarında da xüsusi bir bacarıq yox idi. Deyək ki, 3-cü qolda fərdi ustalıq var idi. Amma ilk 2 qol komanda olaraq, özümüzün səhvi, diqqətsizliyi ucbatından oldu.
– Bu gün evdə Slovakiya ilə oyun var. Həmin qarşılaşma ilə bağlı nə düşünürsünüz?
– Bu cür turnirlərdə üzülməyə də vaxtın olmur. Təbii ki, belə məğlubiyyətlər insana toxunur. İnkişaf etmək istəyiriksə, bu cür rəqiblərə uduzmamalıyıq. Slovakiya ilə oyuna həm psixoloji, həm də fiziki cəhətdən yaxşı hazırlaşmalıyıq. Rəqib də yaxşı komandadır, son Avropa çempionatında bunu göstərdilər. Ümid eirəm ki, nəticə və oyun baxımından hər şey daha yaxşı olacaq.
– "Nürnberq"dəki durumunuz necədir?
– Zədədən yeni qayıtmışam. 3 oyun oynamışam, 2-ni əsas heyətdə meydana çıxmışam. Sağ olsun, baş məşqçimiz, rəhbərlik, klubun menecerləri bu baxımdan mənə çox dəstək olur. Xeyli müddət zədəli olmağım da oyunuma təsirini göstərir. Amma qələbə olduqca, hər şey yoluna düşəcək. Çox xoşdur ki, son turda qalib gəldik.
– Digər ölkələrlə Almaniya futbolunun fərqi nədir?
– Hər şeydə fərq var. "Dinamo" (Zaqreb), ola bilsin, bu gün Avropada daha tanınmış klubdur, amma "Nürnberq"in də tarixi böyükdür. Kimlərsə düşünə bilər ki, 2-ci Bundesliqa olduğu üçün geri addım atmışam. Xeyr, çempionatın səviyyəsi baxımından irəli addım atdığımı düşünürəm. 2-ci Bundesliqa çox səviyyəli çempionatdır, ümid edirəm ki, orada olan atmosferi bir gün özünüz də gəlib görəcəksiniz. Bu çempionatda oynamaq çox xoşdur. Orada olan şərait, meydançalar çox yüksək səviyyədədir, insan məşqə də həvəslə gedir. Mən də bu imkanlardan istifadə edib daha da artırmaq istəyirəm.
– Gələcək planınız nədir: "Nürnberq"də qalmaq, yoxsa buradan tramplin kimi istifadə etmək?
– Onu gələcəkdə görəcəyik. Mənim necə mövsüm keçirməyimdən, eləcə də komandanın nə düşündüyündən çox şey asılı olacaq. İndiki halda, yalnız yaxşı nəticələrə köklənmişəm. Çünki qələbələr gəldikcə, hər şey daha da yaxşı olacaq. Təbii ki, qollar da vurmaq istəyirəm, amma bu baxımdan eqoist futbolçu deyiləm. İlk növbədə komandanın qələbəsi mənim üçün daha önəmlidir. Yeri gəlmişkən, Almaniyada bizə bunu da öyrətdilər.