Millimizin və "Qarabağ"ın mərkəz müdafiəçisi Bəhlul Mustafazadə UEFA Çempionlar Liqasının pley-off mərhələsinin "Dinamo" (Xorvatiya) ilə cavab oyunundan (0:2) Prosport.Az saytının suallarını cavablandırıb.

– Oyunla bağlı fikirlərinizi öyrənək...
– Əlimizdən gələni etdik ki, bu oyunda qalib gələk. Təəssüflər olsun ki, bu bizdə alınmadı. Edə biləcəyimiz bir şey yoxdur. Avropa Liqasına hazırlaşacağıq. Ötənmövsümkündən daha yaxşı çıxış etməyə çalışacağıq.

– Ümumi hesab 0:5 oldu. Demək olar ki, "Dinamo" "Qarabağ"dan birbaş üstündür?
– Əslində belə deməzdim. Xorvatiyadakı oyuna da baxsaq, orada əlimizə düşən imkanlardan yararlansaydıq, oyun başqa ssenaridə davam edərdi. Bakıdakı oyunda isə bizə qələbə lazım olduğundan, irəli atılmışdıq ki, bu da arxa xətdə daha çox boşluqlar buraxmağımıza səbəb oldu.

– 1 qol belə vura bilmədiniz. O qolu vura bilmək üçün nə çatışmadı? Təcrübə?
– Deməzdim ki, təcrübədə onlardan geriyik. Olur ki, 100%-lik imkanları dəyərləndirə bilmirsən. Buna təcrübə yox, şansın çatmadığı deyərdim. Hardasa son vuruşların üzərində də çalışmalıyıq.

– Xorvatiyadakı oyundan sonra da, Bakıdakı matçdan öncə keçirilən mətbuat konfransında da baş məşqçiniz Qurban Qurbanov optimist çıxış etməmişdi. O, mərhələ adlamaq üçün sizə nələri aşılamışdı?
– Biz sadəcə əlimizə düşən şansları dəyərləndirməliydik. Şanslar yaratsaq da, təəssüf ki, yenə onlardan istifadə edə bilmədik. Zaqrebdəki matçdan sonra öz-özümüzə də deyirdik ki, hələ heç nə bitməyib...

– Avropa Liqası yeni formatda keçiriləcək. Maraqlıdır belə format?
– Maraqlı olacağını düşünürəm. Çox oyun keçirəcəyik. Bu bizim üçün də xeyirdir.

Səbuhi Musa