Azərbaycanlı qadın basketbolçu Həvva Nastakalovanın Prosport.Az saytına müsahibəsi

– Bu ildən sizi 3x3 basketbolu üzrə Qadın Seriyasında mübarizə aparan "Baku Fleyms" komandasında çıxış edən görürük. Bura dəvət almağınız necə alındı?
– Əvvəllər mən U-15 millimizdə çıxış etmişəm. Milli ilə Batumidə yarışda da iştirak etmişik. Əslində ötən il 3x3 basketbolunda çıxış edəcəyimi gözləyirdim. Lakin fiziki olaraq zəif olduğumdan, mənə bu barədə təklif gəlməmişdi. Bu il isə mənə "Baku Fleyms"də şans verdilər. Buna görə çox sevindim.

– Rəqiblərə böyük hesabla məğlub olursunuz. Bunun səbəbini nədə görürsünüz?
– Təbii ki, bu mənada bizim rəqiblərlə müqayisədə təcrübəmiz çatışmır. Qubada qrupumuzda yer alan Avstraliya millisi Olimpiadaya da lisenziya qazanmış komandadır. İndi Azərbaycan basketbolu inkişaf etməkdədir. Bizə vaxt lazımdır ki, bu səviyyəyə gəlib çataq. Məsələn, Niderlandla oyunda böyük hesabla (4:21) uduzsaq da, oyun tərzimiz yaxşı alındı. Məşqlərdə etdiklərimizi hardasa oyunda tətbiq edə bildik. Həmin matçda bir az həyəcan da vardı.

– Sizin komandanı bu oyunlara kim hazırlaşdırır?
– Zaur Paşayev.

– Qızlar Liqasında son mövsüm hansı komandada çıxış etmisiniz?
– "Qaradağ" komandasında. 3-cü yer uğrunda görüşdə "Xırdalan"a uduzaraq 4-cü yeri tutduq. "Neftçi" çempion, "Azstars" isə 2-ci oldu.

– 3 nəfərlə basketbol klassik oyundan nə ilə fərqlənir?
– 3x3 basketbolu daha yorucudur. Mənə görə 5x5 basketbolu oynamaq daha asandır. Burada istirahət etmək şansın az olur. 3x3-də fiziki güc, 5x5-də sürət lazımdır.

– Soyadınıza görə sizi legioner sayanlar da olur. Ancaq bilirik ki, ölkəmizin şimal zonasındansınız...
– Bəli. Balakən rayonunun Gərəkli kəndindənəm, milliyyətcə avaram.

Səbuhi Musa