Azərbaycan Basketbol Federasiyasının prezidenti Emin Əmrullayev "Sabah"ın ölkə çempionu olmasından sonra jurnalistlərə müsahibə verib.

Prosport.Az-ın əməkdaşının da iştirak etdiyi müsahibəni təqdim edirik. 

– Mövsüm başa çatdı və "Sabah" qalib oldu. Fikirlərinizi öyrənək...
– İlk növbədə "Sabah"ı qələbə münasibəti ilə təbrik edirəm. Düşünürəm ki, bumövsümkü çempionat maraqlı alındı. İnanıram ki, "Sabah" komandası Avropada Azərbaycanı uğurla təmsil edəcək.

– Növbəti mövsüm I Liqa olacaqmı, yoxsa yenə çempionat ancaq Yüksək Liqadan ibarət olacaq?
– Hazırda müzakirələr Yüksək Liqada komanda sayının artırılması yönündədir. 2 yeni komanda Azərbaycan Basketbol Liqasında mübarizə apara bilər. Həmçinin, Tələbə Liqasında mübarizə aparan komandaların I Liqaya transformasiya edilməsi yönündə müzakirə aparılacaq. Yaxın günlərdə bununla bağlı ictimaiyyətə məlumat veriləcək.

– Avrokuboklarda neçə komanda Azərbaycanı təmsil edəcək?
– Hüquqi cəhətdən 3 klubla təmsil oluna bilərik. İnanıram ki, "Sabah" Çempionlar Liqasında təmsil olunacaq. FIBA Avropa Kubokunda da 2 klubla təmsil oluna bilərik. Ancaq bu klubların maliyyəsindən asılı olacaq. Biz federasiya olaraq bu qərarlara dəstək verəcəyik.

– Azərbaycan Kubokunun qalibi "Neftçi"nin də avrokubok şansı var?
– Bəli. Kubokun qalibi, 2-3-cü yerlərin sahibləri bu yarışda mübarizə apara bilər. Hansı klub avrokubokda yarışmaqdan imtina etsə, onu pley-offdan digər klubun əvəzləməsi mümkündür. Ancaq yenə deyirəm ki, bu, klubların maliyyəsinə bağlı olan məsələdir. Ancaq "Sabah"ın avrokuboklarda çıxış edəcəyi dəqiqdir. Bu səbəbdən dəqiq deyə bilərəm ki, ötənmövsümkü kimi Azərbaycanı minimum 1 komanda Avropada təmsil edəcək.

– Qadınlardan ibarət 3x3 basketbol millimizdən Olimpiadada nə gözləyirik?
– Olimpiadaya vəsiqə qazanmaq özü bir uğurdur. İnşallah, bu naliliyyətlərin davamı gələr. Yığmamız üçün bu böyük təcrübə olacaq. Orada yer alan rəqibləri özünüz bilirsiniz. Mən də hər kəs kimi komandamıza azarkeşlik edəcəyəm.

Səbuhi Musa