"Azərreyl" voleybol klubu başa çatan 2023/24 mövsümündə həm qadınlarda, həm də kişilərdə çempion olmaqla tarix yazdı.
Prosport.Az bu münasibətlə həmin klubun prezidenti Orxan Kərimovdan müsahibə götürüb.
– Mövsümün əvvəlində kluba prezident təyin olundunuz. İlk ilinizdə "Azərreyl"in həm qadın, həm də kişi komandası Azərbaycan çempionu oldu. Bunu "qızıl dubl" da adlandırmaq olar. Bildiyim qədəri ilə ilk belə haldır ki, bir klubun həm qadın, həm də kişi komandası Azərbaycan çempionu olur...
– Özüm voleybolsevər olmuşam. Siz düzgün vurğuladınız. Mən də son 10 ildə bir klubun 2 komandasının Azərbaycan çempionu olduğunu xatırlamıram. Bəlkə də ondan əvvəlki il belə hal olub. Bu, çox qürurverici hisslərdir. Mövsümün əvvəlində bu nəticəni gözləyirdikmi? Bəlkə də xeyr, bəlkə də bəli. Əlbəttə, "Azərreyl"in qadın komandası Azərbaycanda əfsanəvi komandadır. Bu komandanın çempionluğu dəfələrlə olub. Ancaq "Azərreyl"in kişi komandası yeni qurulmuşdu. Məqsədimiz ilk növbədə güclü komanda qurmaq idi. Mövsümün ortasında isə Azərbaycan çempionu olmağı qarşımıza məqsəd kimi qoyduq. Bu məqsədə çatdığımıza görə də şadam.
– "Azərreyl"in qadın komandasının avrokuboklarda çıxış edəcəyi heç kimdə şübhə doğurmur. Bəs kişi komandasının da avrokubokda çıxış etməsi üçün klubun büdcəsi yetərlidirmi?
– Bu, yaxşı sualdır. Ancaq bu sualın cavabına yaxın zamanda aydınlıq gələcək. Əlbəttə, çox istərdik ki, hər iki komandamız avrokubokda çıxış etsin. Büdcə məsələləri çox vacibdir. Bunu qaydasına salmalıyıq ki, sonradan heç bir problem yaşamayaq. Büdcə ilə bağlı lazımi zəmanət aldıqdan sonra kişi komandası ilə avrokubokda çıxış etmək niyyətimiz var.
– Klubun Azərbaycan Voleybol Federasiyasından maliyyələşdiyi heç kimə sirr deyil. Sponsor cəlb olunması üçün marketinq işi necə həyata keçirilir?
– Artıq 2 sponsor kluba yeni cəlb olunub. Bunlardan biri "Beta Tea" çay şirkəti ilə əməkdaşlığa başlamışıq. Onların loqosunu komandanın formasında da görmək olar. Daha bir sponsorumuz isə "Delta Telecom" IT şirkətidir (bu yerdə qeyd edək ki, "Delta Telecom"un müştəriləri arasında federasiya prezidenti Şahin Bağırovun rəhbəri olduğu Dövlət Gömrük Komitəsi də var – S.M.). Əlbəttə, sponsor tapmaq asan deyil. Ancaq voleybolda öndə gedən ölkələrin təcrübəsindən istifadə edərək yeni sponsorların cəlb olunması yönündə işlər gedir.
– Sizin "Azərreyl"ə klub prezidenti təyin olunmağınızı ötən ilin iyulunda ilk olaraq bizim sayt yazmışdı. Keçmişə boylansaq, bu təyinatın necə baş tutduğunu danışardınız...
– Yəqin, bilirsiniz ki, 2 il kişilərdən ibarət "Təhsil" komandasına rəhbərlik və baş məşqçilik etmişəm. Ötən mövsüm I Liqada çempion olmuşduq. Yəqin ki, oradakı işim uğurlu olduğundan, bu etimad mənə göstərilib. Mən də sevə-sevə bu təklifi qəbul etdim və işimi də sevə-sevə davam etdirirəm. "Azərreyl" artıq mənə bir ailə kimi gəlir. Bu oyunlarda yaşadığım həyəcanı yaxınlarım görüb. Bu klub mənim üçün doğma bir ailə kimidir.
– Voleyboldan başqa, hansısa sahədə çalışırsınız?
– Bəli. Ancaq bunu açıqlaya bilmərəm.
Səbuhi Musa
