Azərbaycan Basketbol Federasiyasının baş katibi Vüqar Əzimovun Prosport.Az saytına müsahibəsi
– 3x3 qadın basketbol millimiz tarixdə ilk dəfə Paris Olimpiadasına vəsiqə qazandı. Siz də Honkonqda həmin anların canlı şahidi olmusunuz...
– Qrupda ilk matçımızı Çiliyə qarşı keçirdik. Onların bir oyunçusunun zədələnməsi işimizə çox kömək oldu və qalib gəldik. Adətən biz yarışlara yaxşı start vermirdik. 2-ci oyunda Monqolustanla matç çox gərgin keçdi. Tiffani Heys həmin oyunda zədə aldı. Bu səbəbdən Niderlandla matçda onu oynatmadıq ki, yarımfinala hazır olsun. Çünki həmin matçda oynasaydı, yarımfinalda çıxış etməmək riski vardı. Yarımfinal və final əməlli-başlı triller oldu. İnanın mənə, finalda Aleksandra Mollenhauerin son topundan sonra neyləmişik, heç özümüzdən xəbərimiz olmayıb. Yəni, biz maksimumu etdik. Federasiyanın qarşısında duran ən böyük məqsəd Honkonq turnirində qalib olmaq idi. Çox şadam ki, arzumuza, məqsədimizə çatdıq.
– Finalda Polşa yox, Niderland sizə rəqib olsaydı, çətin ola bilərdi. Çünki son Avropa çempionları idilər və üstəlik qrupda onlara uduzmuşdunuz. Siz necə düşünürsünüz?
– Tam əksinə, biz finalda Niderlandla düşməyi istəyirdik. Hətta biz Tiffani Heyssiz oynasaq da, həmin matçda bizə qarşı çox da yaxşı oyun göstərmədilər. Bizim üçün Niderland daha uyğun rəqib idi. Polşada 3 nömrəli oyunçu amerikalı legionerdir, çox güclüdür. Ancaq sonda yenə biz qələbə qazandıq.
– Olimpiadaya bu heyət gedəcək, yoxsa hansısa dəyişiklik olacaq?
– Bu, çox aktual sualdır. Dünəndən jurnalistlər bu barədə soruşur. Bizdə 5 oyunçu var, ancaq bunların 4-ü gedəcək. Bu, son yarış deyil. Bildiyiniz kimi, Paris Olimpiadasından əvvəl Qəbələdə Dünya Turu və başqa ölkələrdə analoji yarış var. Həmin yarışlarda hansı basketbolçular daha hazırlıqlı olsa, həmin heyət də Parisə gedəcək.
– Yeri gəlmişkən, Dünya Turu ötən il bölgələrdən Şuşa və Astarada keçirilmişdi. Bu dəfə şimal rayonlarımıza – Qəbələ və Qubaya salınıb. Dəyişikliyin səbəbi nədir?
– Səbəb basketbolu bölgələrdə yaymaq, populyarlaşdırmaq, insanları, xüsusən uşaqları bu idman növünə cəlb etməkdir.
Səbuhi Musa