AFFA İcraiyyə Komitəsinin üzvü Xəyal Cəfərov futbolxeber-in suallarını cavablandırıb. Prosport.az həmin müsahibəni təqdim edir:

- Aprelin 2-də keçirilən AFFA-nın Hesabat-Seçki Konfransında İcraiyyə Komitəsinin üzvü seçildiniz. Bu münasibətlə sizi təbrik edirik.

- Çox sağ olun, minnətdaram.

- Komitə üzvü kimi Azərbaycan futbolunun inkişafı üçün nə planlarınız, nə təklifiniz var?

- İcraiyyə Komitəsinin növbəti iclası mayın əvvəlində olacaq. Hər bir üzv tədbirlər planını, öz təkliflərini verəcək. İnşallah ondan sonra bu barədə rəsmi açıqlama olacaq.

- Azarkeşlər, futbol ictimaiyyəti yeni AFFA rəhbərliyindən nə gözləsinlər?

- Təbii ki, yenə deyirəm, müəyyən məsələləri hamı bilir. İnfrasraukturun, uşaq futbolunun inkişafı, azarkeşləri stadiona cəlb etmək, yəni, məqsədlər bəllidir. Əlimizdən gələni edəcəyik ki, Azərbaycan futbolunu daha da yüksək səviyyəyə aparaq.

- Ən aktual məsələlərdən biri millinin hələ də boş olan baş məşqçisi vəzifəsidir..

- Rövşən Nəcəf bu barədə açıqlama vermişdi. Qısa zamanda bu məsələyə də aydınlıq gələcək.

- Namizəd məşqçilərin siyahısından xəbərdarsınız?

- Bu barədə hələ bir söz deyə bilmərəm.

- Siz özünüz əcnəbi məşqçinin tərəfdarısınız, yoxsa yerli?

- Bu, tək bir nəfərin qərarı deyil. İcraiyyə Komitəsi bu haqda qərar qəbul edəcək. Qısa zamanda bu məsələyə aydınlıq gələcək.

- Premyer Liqada iştirakçı sayının artırılması barədə də müzakirələr gedir. Bu, nə dərəcədə realdır?

- Bu məsələ də gündəmdədir, müzakirə olunacaq. Rəsmi açıqlama olanda hər şeyi eşidəcəksiniz.

- Sizin “Neftçi”yə gəlişinizlə bağlı nə yenilik var?

- O barədə hələ heç bir əlavə məlumatımız yoxdur.