Kişi taekvondo millimizin baş məşqçisi Məmməd Abdullayevin Prosport.Az saytına müsahibəsi
– Yaxınlarda uşaqlar arasında ilk dəfə ölkə birinciliyi keçirildi. Bu barədə fikirlərinizi öyrənək...
– Taekvondo dinamik idman növüdür. Adətən uşaqlar burada 5-6 yaşdan məşğul olmağa başlayır. İlk dəfə 9-11 yaşlı uşaqları Azərbaycan Taekvondo Federasiyası sınağa çəkdi və Respublika birinciliyi keçirildi. Uşaqlar bünövrədir. Nə qədər çox uşaq taekvondoçu olarsa, bu, Azərbaycan taekvondosunun gələcəyindən xəbər verir. Hər bir olimpiya çempionu, mükafatçısı, dünya və Avropa çempionu addımlarını uşaqlıqdan atır. Ona görə də bu, sevindirici məqamdır.
– Bəs niyə bu yarışı keçirməkdə gecikdik?
– Çünki indiyədək kiçik yaşlı yeniyetmələrin rəsmi yarışı da yox idi. Əslində federasiya hər zaman zonalar üzrə bu yarışı keçirib. Hazırda bu yaş kateqoriyası üçün Avropa və dünya çempionatları keçirildiyindən, Taekvondo Federasiyası da uşaqların ölkə birinciliyini ilk dəfə keçirmək qərarı verdi.
– Amma daha əvvəl də Azərbaycan millisi kiçik yaşlı yeniyetmələrin Avropa çempionatında iştirak edib...
– O, rəsmi deyildi. Rəsmi yarış hər çəki dərəcəsində bir azərbaycanlı idmançının yarışdığı turnirdir.
– Olimpiadada Azərbaycana medallar qazandırmış taekvondo millimiz bu dəfə Parisdə cəmi 1 idmançı ilə təmsil olunacaq. Kənardan taekvondomuzun səviyyəsi necə görünür?
– Mən cəmi 7 aydır ki, kişi millisinin baş məşqçisiyəm. Bu 7 ay ərzində 2 lisenziyadan 1-nin qazanılması böyük nəticədir. Nəzərə alaq ki, həmin lisenziya da "Grand Slam" ("Böyük Dəbilqə") yarışının reytinqinə əsasən alınıb. Lisenziya alan idmançımız finalda Bakıda dünya çempionu olmuş idmançını (koreyalı Pe Çjun-so) da məğlub etdi. Təbii ki, istərdik, 2 idmançı ilə Parisə yollanaq. Amma buna da şükür olsun.
– Olimpiadayadək lisenziya almış idmançımız Həşim Məhəmmədovu hansısa turnir gözləyir?
– Mayda Avropa çempionatında iştirak edəcək. Hazırda milli komanda ora hazırlıq prosesindədir. Yarış 10-12 may tarixlərində Serbiyanın paytaxtı Belqradda keçiriləcək. Bu turnirdən sonra sırf Həşim üçün Olimpiadaya hazırlıq proqramı tutulacaq. Yəqin ki, bir sparrinq rəqib müəyyənləşdirib hazırlıq keçəcəyik. Ölkə daxili və xaricində məşq edəcəyik.
– Hazırlıq harada olacaq?
– Onu hələ müəyyənləşdirməmişik. Vaxt çoxdur. Bunu rəhbərliklə danışdıqdan sonra təyin edəcəyik.
Səbuhi Musa