Azərbaycan bu il Paris Olimpiadasında taekvondoda cəmi 1 idmançı ilə təmsil olunacaq. Yarışda qadın taekvondoçularımızdan heç kim olmayacaq. Halbuki 2016-cı il Rio Olimpiadasında Patimat Abakarova bürünc medal qazanıb.
Prosport.Az qadın taekvondo millimizin koreyalı baş məşqçisi Sun-mi Parkdan müsahibə götürüb, uğursuzluğun səbəbini öyrənməyə çalışıb.
– İlk dəfə ölkədə uşaq taekvondoçular arasında ölkə birinciliyi təşkil olundu. Bununla bağlı nə deyə bilərsiniz?
– Çempionat çox yaxşı keçdi. Orada çıxış edən qızlar yaxşı döyüşdülər. Koreyada da bu yaş qrupunda yarışlar keçirilir. Azərbaycanda da bu yarışın keçirilməsi sevindirici haldır. Mən Azərbaycanı, sizin xalqı çox sevirəm. Yaxşı xalqınız var.
– Bu il Olimpiadada qadın taekvondoçularımız olmayacaq. Bunun belə olmasının səbəbi nədir?
– Mən ötən il komandaya baş məşqçi təyin olundum. Ona görə də nəsə iş görmək üçün vaxtım az idi. İndiki heyətdəki qızların 17 yaşı var. Ancaq fikrimcə, 2028-ci ildə ABŞ-də keçiriləcək Olimpiadaya qatılıb medal qazanacağıq.
– Əvvəl yığmada təcrübəli taekvondoçular – Patimat Abakarova və Fəridə Əzizova vardı. Bildiyimə görə, onları siz millidən uzaqlaşdırmısınız. Bunun səbəbi nədir?
– Fəridədə bel ağrısı var. Patimatın isə mən gəlməmişdən öncə anası ölmüşdü, psixoloji durumu qaydasında deyildi. Həm də hər ikisinin yaşı da çoxdur.
– Ancaq təcrübə hesabına yığmaya kömək edə bilməzdilər?
– Təcrübələri ola bilər. Ancaq fiziki cəhətdən zəifdirlər. Lisenziya turnirlərində çatdıra bilməyəcəkdilər.
– Bəs Bolqarıstanın paytaxtı Sofiyada keçirilmiş Avropa Olimpiya Təsnifat Turnirinə apardığınız Zemfira Həsənzadə ilə Nigar Abdullayevanın səviyyəsi necədir?
– Onlar yaxşıdır. Sadəcə, ilk dəfə lisenziya turnirində iştirak edirdilər. Gəncdirlər deyə, təcrübələri az idi.
– Rəhbərlik bu zəif nəticə barədə nə deyir?
– Federasiya prezidenti Kəmaləddin Heydərov həmişə bizə dəstək olur. O bilir ki, əvvəl mən Azərbaycana qadınlarda olimpiya medalı gətirmişəm.
– Siz daha əvvəl də millimizdə baş məşqçi işləmişdiniz. 2016-cı ilin sonu və ya 2017-ci ilin yanvarında federasiyadan göndərildiniz. Onda niyə ayrılmışdınız və niyə geri qayıtdınız?
– Onda bir az narazılıq olmuşdu. Gedib Kanadada işləyirdim. Mən orada – Toronto şəhərində yaşayıram. Daha sonra zəng gəldi və yenidən qayıtmağım istənildi, geri döndüm. Ancaq Kanadada olan vaxt belə, həmişə ürəyim Azərbaycanla olub. Həmişə qızlarımızın çıxışını izləyirdim.
Səbuhi Musa
