"Qarabağ"ın 15 yaşadək komandasının kapitanı Uğur Qurbanlının Prosport.Az saytına müsahibəsi

– Belarusda keçirilmiş "Bizim gələcəyimiz" adlı yarışda 5-ci yeri tutdunuz. Turnir sizə nə dərəcədə kömək olacaq?
– Bu yarış təcrübə və peşəkarlaşmağımız baxımından çox yaxşı turnir idi. Turnirin qalibi olmağa gəlmişdik, amma ola bilmədik. Bu yarış mənim üçün çox yaxşı təcrübə oldu. İnşallah, Bakıda daha yaxşı davam edəcəyik.

– Ötən yay qalib olduğunuz Türkiyədəki "Kartepe Cup" turniri ilə müqayisə etdikdə, komandaların səviyyəsini necə gördünüz?
– Çox fərq vardı. Burada daha peşəkar komandalar mübarizə aparırdı. Fiziki baxımdan daha yaxşı səviyyədə olan komandalar idi. Buna baxmayaraq, hamısı ilə var-gücümüzlə mübarizə aparmağa çalışdıq.

– Bu turnirdə qalib olmamağınızı bir qədər də arxayınlıqla əlaqələndirmək olarmı?
– Biz həmişə Azərbaycan komandalarına 5-6 qol vurmağa öyrəşmişdik. Burada başa düşdük ki, güclü komandalar da var. Başqa turnirlərdə daha yaxşı çıxış etməyə çalışacağıq.

– Neçə vaxtdır ki, "Qarabağ"dasınız?
– Artıq 9-cu ildir.

– Komandanın yaşca ən kiçik 3 futbolçusundan biri olsanız da, kapitan sarğısını daşıyırsınız. Sizcə, hansı xüsusiyyətinizə görə kapitanlıq sizə həvalə olunub?
– Uşaqlara motivasiya verməyi bacarıram. Görünür, müəllimlər məndə bu xüsusiyyəti gördüyü üçün belə qərar verilib. Bu sarğı qolumda olanda özümə də yaxşı oynamaq üçün motivasiya verir.

– Türkiyədəki turnirdən etibarən qol sevincinizi Musa Qurbanlı kimi qeyd edirsiniz. Ancaq o hücumçu, siz isə mərkəz müdafiəçisiniz. Niyə bu qol sevincini özünüzə götürdünüz?
– Soyadlarımız eynidir. Həm də xoşuma gələn futbolçudur, ona görə də onun kimi etməyə başladım.

– Ümumiyyətlə, onunla görüşmək imkanınız olub?
– Hələ ki xeyr.

Səbuhi Musa