"Neftçi"nin nigeriyalı hücumçusu Aaron Samuel Olanarenin Prosport.Az saytına müsahibəsi

– Azərbaycan Premyer Liqasının VIII turunda səfərdə "Turan Tovuz"a 1:0 hesabı ilə qalib gəldiniz. Çətin oyundan qalib gəlmək necə hissdir?
– Biz həmin oyunda yaxşı mübarizə apardıq, topa yiyələndik. Bir az əksikliklərimiz oldu. Ancaq ümumilikdə yaxşı nəticə ilə bunu ört-basdır etdik.

– Bunadək son 2 oyunda qalib gələ bilmirdiniz. Komandanın üzərində bu baxımdan təzyiq vardı?
– Hər hansısa təzyiq hiss etmirdim. Ancaq bilirdik ki, son 2 matçda qalib gəlməliydik. Tovuzdakı qələbə ilə "kam-bək" etdiyimizi düşünürəm.

– Yəni bu qələbə "Neftçi"yə digər matçlarda 3 xal üçün kömək edəcək? Məsələn, bu tur "Qarabağ"la derbi matçı var...
– Məncə, kömək edəcək. Son 3 xal komandada beyinlərdə motivasiya formalaşdırıb. Biz hər bir oyunda qalib gələ bilərik. Yetər ki, özümüzə inanaq.

– "Zirə" ilə matçda ehtiyatda qaldınız. Tovuzda isə 73-cü dəqiqədə Yeqor Boqomolskinin yerinə meydana daxil oldunuz və 14 dəqiqə sonra başla qələbə qolunu vurdunuz. Niyə çox oynamaq şansı əldə edə bilmirsiniz?
– Səbəbini bilmirəm. Bu, baş məşqçidən asılı olan məsələdir. Ola bilsin ki, bu qərar onun rəqibə uyğun tapşırıqlarından, meydanda verdiyi taktikadan asılı olaraq verilir. Əsas qələbə qazanmaq idi.

– Həmin matçda yeganə qolu vurduğunuza görə sizi matçın qəhrəmanı adlandırmaq olar?
– (gülür) Bilmirəm. Komandada hamı qəhrəmandır. Biz fərd olaraq yox, komanda olaraq mübarizə aparırıq. Sadəcə olaraq, qol vurmaq şansı əldə etdim və bunu bir hücumçu olaraq dəyərləndirdim.

Səbuhi Musa