“Neftçi”yə qalib gələrək (1:0) xallarının sayını 10-a çatdıran və turnir cədvəlində 5-ci pilləyə yüksələn “Araz-Naxçıvan” 2 günlük istirahətin ardından bu gün məşqlərini bərpa edir.
Prosport.Az xəbər verir ki, “ağ-qırmızılar”ın moldovalı qapıçısı Kristian Avram həm son, həm də növbəti görüşlə bağlı klubun rəsmi saytına müsahibə verib.
– Başlayaq “Neftçi” ilə oyundan. Əksəriyyət “Araz-Naxçıvan”ın qələbəsini sürpriz hesab edir...
– Elə deməzdim. Bilirəm ki, “Neftçi” iddialıdır, çempionluq uğrunda mübarizə aparır, heyətində çoxsaylı futbolçu var. Biz də rəqibin kimliyindən asılı olaraq, bütün oyunlara qələbə qazanmaq üçün çıxırıq. Baş məşqçimiz bunu tələb edir. Hansısa oyuna çıxanda deməyib ki, heç-heçə məni qane edir. Çox ambisiyalıdır. “Neftçi” ilə matça da yaxşı hazırlaşmışdıq. Bəhrəsini də gördük. Mübarizə apardıq, məşqçi heyətinin tapşırıqlarını yerinə yetirdik, buna görə də 3 xal qazandıq.
– Məhəmməd Kadiri qırmızı vərəqə alan zaman nə düşündün?
– Kadiri oyun epizodu zamanı 2-ci sarı – qırmızı vərəqə aldı. Komandaya çox kömək etdi. O, meydandan çıxdıqdan sonra panikaya düşmədik, əksinə, konsentrasiyamızı artırdıq, daha diqqətli olduq.
– Komandamız növbəti oyunda “Səbail”lə qarşılaşacaq. Onların da 3 oyunluq qələbə seriyası var. Bu rəqib haqda nə düşünürsən?
– 2 günlük istirahətdən sonra məşqlərimizi bərpa etdik. Lazım olan informasiyanı baş məşqçimiz verəcək. Diqqətli olmalı, yaxşı hazırlaşmalıyıq. Yenə deyirəm ki, rəqibin kimliyindən asılı olmayaraq, bizdən qələbə tələb olunur.
– Çempionatın hazırkı bombardirinin “Səbail”də çıxış etməsi xüsusi diqqət tələb edirmi?
– Futbol kollektiv oyundur. Konkret hansısa futbolçuya diqqət yetirmək, ancaq onu zərərsizləşdirməyə fokuslanmaq düzgün deyil. Komanda olaraq meydanda məqsədimizə nail olmaq üçün hər şeyi edəcəyik. Məşqçilərin verəcəyi informasiya da vacibdir.
– Oyunun süni örtüklü meydanda keçirilməsi səni narahat etmir?
– Biz peşəkar futbolçularıq. Əlbəttə, daha yaxşı olardı ki, bütün oyunlar təbii örtüklü meydanlarda keçirilsin. Amma bu gün şərait budursa, razılaşmaq lazımdır.
– Premyer Liqa haqda nə düşünürsən?
– Oyunlar da, nəticələr də maraqlıdır. Əksər komandalar yüksək yerlərə iddialıdır. Hər kəs mübarizə aparır. Zəif rəqib yoxdur. Əlbəttə, bu Azərbaycan futbolu üçün vacib amildir.
– Hazırda komandamız 5-ci pillədə məskunlaşıb. Yuxarı yerlərə qalxmaq mümkün olacaqmı?
– Çempionat yeni başlayıb. Heç 1-ci dövrə başa çatmayıb. Qış fasiləsində çox dəyişikliklər ola bilər. İndidən kimsə deyə bilməz ki, mövsümü filan pillədə başa vuracağam. Onu mayda biləcəyik. Ancaq hazırkı mövqeyimizi yaxşılaşdırmaq imkanımız var. Təsəvvür edin ki, 4 komandanın aktivində eyni sayda xal var.