"Kəpəz"in futbolçusu Elnur Cəfərovun Prosport.Az saytına müsahibəsi

– Azərbaycan Premyer Liqasının VI turunda "Səbail"ə 0:3 hesabı ilə uduzdunuz. Böyük hesablı məğlubiyyət bir qədər gözlənilməz olmadı ki?
– Oyuna çox ciddi hazırlaşmışdıq. Matçın məsuliyyətini dərk edirdik. Öz səhvimizdən buraxılan ilk qol bizdə psixoloji düşkünlük yaratdı. Toparlanmağa çalışsaq da, 2-ci qolu buraxandan sonra komandanı yığıb-yığışdırmaq çətin oldu. Bu da oyunun qırılma nöqtəsi idi.

– Ümumiyyətlə, komandada motivasiya çatışmazlığı hiss olunur. "Neftçi" və "Qarabağ"dan xal alırsınız, ancaq ortabab bilinən komandalarla matçlarda erkən qollar buraxırsınız...
– Gəncədə 2 oyunu uduzmuşduq deyə, hər bir oyunçu matçın məsuliyyətini dərk edirdi. Kənardan başqa cür görünə bilər. Ancaq biz evdə növbəti dəfə uduzmamaq üçün qalib gəlmək istəyirdik. Sadəcə, hər şey istədiyimiz kimi getmədi.

– İlk hissədə real qol vəziyyəti var idi ki, sol ayaqla zərbə endirdiniz. Bəlkə də sağ ayaqla vursanız, qol ola bilərdi. Bu epizodu necə şərh edərsiniz ?
– Əsas ayağım soldur. Lakin top istədiyim kimi ayağıma oturmadı. Meydança hamar deyil deyə narahatlıq oldu. Topu uzaq küncə vurmaq istəsəm də, alınmadı. Alınsaydı, oyunun axarı çox dəyişəcəkdi.

– Ümumiyyətlə, 2-ci hissədə fərdi ustalığınız sayəsində təhlükəli epizodlar yaratdınız. "Xəzər Lənkəran"da çıxış etdiyiniz vaxtları xatırlatdınız...
– Əvvəlki Elnur Cəfərovu xatırlatmaq üçün hələ çox iş görməliyəm. Bunun üzərində çalışıram. Oyundan oyuna daha çox komandaya xeyir vermək istəyirəm.

– Azarkeşlər "istefa" şüarları səsləndirdilər. Bu, oyununuza psixoloji cəhətdən təsir edir?
– Oyunun gedişində istər-istəməz futbolçu üzərində təzyiq yaradır. Amma bu vəziyyətə özümüz düşmüşüksə, özümüz də çıxmalıyıq.

– Çıxış yolunu nədə görürsünüz?
– Sadə səhvlər etməməliyik. Oyunları analiz edib nəticələr çıxarmalıyıq ki, növbəti qarşılaşmalarda həmin səhvləri maksimim dərəcədə etməyək.

Səbuhi Musa