"Səbail"in sol cinah müdafiəçisi Yusif Nəbiyev "Kəpəz"i 3:0 hesabı ilə məğlub etdikləri matçdan sonra jurnalistlərə müsahibə verib.

Prosport.Az-ın Gəncəyə ezam olunmuş əməkdaşı həmin müsahibəni təqdim edir:

– İlk olaraq matç haqda fikirlərinizi bölüşərdiniz...
– Qələbə qazandığımıza görə sevincliyik. Hamı bilir ki, Gəncədə futbol oynamaq həqiqətən çətindir. "Kəpəz" evdə çox yaxşı oynayır. Mən də burada futbol oynamışam, atmosferə yaxşı bələdəm. Şükürlər olsun ki, 3 xalla geri dönürük.

– Qol vurdunuz və sevinmədiniz. Bu haqda nə deyə bilərsiniz?
– Oyundan öncə fikrimdə tutmuşdum ki, qol vursam, sevinməyəcəyəm. "Kəpəz"də oynamışam, komandanın kapitanı olmuşam. Sevinmək mənə yaraşmazdı. Çünki bu azarkeşlər də məni çox istəyir. Eyni zamanda mənim də hamısına böyük hörmətim var.

– 4 ay sonra ilk dəfə Gəncəyə qayıtmısınız. Hansı dəyişiklikləri görürsünüz?
– Bu yaxınlarda akademiyanın açılışı olmalıdır. Bu, sevindirici xəbərdir. Komanda haqqında bir söz demək istəmirəm. Uğurlar arzulayıram. İstəyərdim ki, burada şərait çox yüksək səviyyədə olsun.

– "Səbail"ə keçəndən sonra milli komandadan təklif aldınız və ilk matçda debüt etmək fürsətiniz oldu. Hissləriniz necədir?
– Hər bir futbolçu kimi mənim üçün də milli komandanın formasını geyinmək, oynamaq böyük şərəfdir.  Az oynadım, amma çox sevindim. Məni dəvət etdikləri üçün təşəkkür edirəm. Gələcəkdə yenə dəvət alsam, çalışacağam ki, əlimdən gələnin ən yaxşısını edim.

– Qrupda artıq bütün rəqiblərlə tanışıq. Milli komandadan nə gözləmək olar?
– Düşünürəm ki, Belçika ilə oyunumuz pis alınmadı. Həqiqətən uşaqlar yaxşı mübarizə apardı. Növbəti matçlarda da çalışacağıq ki, bundan daha üstün oynayıb, yaxşı nəticələr əldə edək.