"Çempionata qızıl medal hədəfi ilə yollanmışdım, amma 9 turdan 9 qələbə qazanmaq mənim üçün də böyük sevinc oldu. Turnir çox gərgin keçdi, xüsusilə həlledici turlarda güclü rəqiblərlə qarşılaşdım. Hələ son turdan əvvəl çempionluğunu təmin etsəm də, sonuncu görüşə də qələbə əzmi ilə çıxdım və seriyanı qırmaq istəmədim”.
Prosport.Az xəbər verir ki, bu sözləri 18 yaşadək şahmatçılar arasında Avropa çempionu adını qazanan Nərmin Abdinova Azərbaycan Şahmat Federasiyasının (AŞF) rəsmi saytına açıqlama verərkən deyib.
Fenomenal nəticəyə imza atan gənc zəka sahibi qitə birinciliyindəki təəssüratlarını bölüşüb və qələbəsində əməyi olanlara minnətdarlığını bildirib: “Bu uğurda üzərimdə əməyi olan məşqçilərimə, federasiyaya təşəkkür edirəm”.
Qeyd edək ki, yarışı maksimal nəticə ilə başa vuran Nərmin Abdinova (18 yaşadək qızlar) IX turda FIDE təmsilçisi Lizaveta Liashkeviçi məğlub edərək maksimum nəticə fenomenal uğura imza atıb.
18 yaşlı oğlanların yarışında Tunar Davudov son turda Polşa şahmatçısı Pavel Sovinskini üstələyərək xalını 7-yə çatdırıb və qitə çempionatının gümüş medalını qazanıb.
8 yaşlı qızların mübarizəsində isə Selin Məmmədova Türkiyə şahmatçısı Eliz Karahana qalib gələrək fəxri kürsünün 3-cü pilləsinə yüksəlib və ölkəmizə bürünc medal qazandırıb.
