Yunanıstanın Krit adasındakı Hersonissos şəhərində keçirilən 8–18 yaşadək şahmatçılar arasında Avropa çempionatını 3 medalla başa vuran Azərbaycan təmsilçiləri Vətənə qayıdıb.
Prosport.Az xəbər verir ki, Heydər Əliyev Beynəlxalq Aeroportunda qitə birinciliyindən 1 qızıl, 1 gümüş və 1 bürünc medalla dönən şahmatçılarımızın qarşılanma mərasimi keçirilib. 42 ölkə arasında ümumi medal hesabında 3–5-ci yerləri bölüşdürən millimizi hava limanında Azərbaycan Şahmat Federasiyasının nümayəndələri, idmançıların valideynləri və media mənsubları qarşılayıblar.
Xatırladaq ki, yarışı maksimal nəticə ilə başa vuran Nərmin Abdinova (18 yaşadək qızlar) 9-cu turda FIDE təmsilçisi Lizaveta Liashkeviçi məğlub edərək 9 turda 9 xalla fenomenal nəticəyə imza atıb. 18 yaşlı oğlanların yarışında Tunar Davudov son turda Polşa şahmatçısı Pavel Sovinskini üstələyərək xalını 7-yə çatdırıb və qitə çempionatının gümüş medalını qazanıb. 8 yaşlı qızların mübarizəsində isə Selin Məmmədova Türkiyə şahmatçısı Eliz Karahana qalib gələrək fəxri kürsünün üçüncü pilləsinə yüksəlib və ölkəmizə bürünc medal qazandırıb.
