"Araz-Naxçıvan"ın futbolçusu Vadim Abdullayevin Prosport.Az-a müsahibəsi
– Bir ara futboldan aralı düşmüşdünüz. Daha sonra "Araz-Naxçıvan"da peyda oldunuz. Nə baş verdi ki, yenidən futbola qayıtmağa qərar verdiniz?
– Düz vurğuladınız. Mən bir ara futboldan uzaqlaşmışdım. Vaxt gələcək ki, bunun səbəbini açıqlayacağam. Əsas odur ki, futbola qayıtmışam. Mənə güvənib, bu komandaya çağırıblar. Bura qayıtmağım üçün uzun yol gəlmişəm. Region Liqası, I divizion, indi də bu komanda ilə Premyer Liqada çıxış edirəm. Bundan sonra ancaq irəli getmək lazımdır.
– "Araz-Naxçıvan"adək son klubunuz "Sabah" olub. Ondan sonra futbola nə qədər ara verdiniz?
– 2 il olar.
– O müddətdə heç bir yerdə oynamadınız?
– 3-4 aylıq MOİK-də çıxış etdim. Ondan sonra inciyib birdəfəlik ölkədən getdim. Ailəmi də götürüb Rusiyaya köçdüm. Orada fəhləlik etdim. Başıma gələnlər, futbolda gördüklərimi vaxt gələndə danışacağam. Hər şeyin vaxta ehtiyacı var. Səbəbini bir gün açıqlayacağam.
– İndi açıqlamamağınızın səbəbi nədir? Qorxursunuz ki, qalmaqallı futbolçu kimi adınız çıxar?
– Onsuz da məni ölkədə elə tanıtdırıblar. Futbolda çox haqsızlıqlarla üzləşmişəm. Həqiqətən də futboldan birdəfəlik qopmuşdum, qayıtmaq niyyətim yox idi. Sağ olsun bu klub ki, mənə güvəndi və futbola yenidən qayıtdım.
– Qayıtmağınız üçün ilk zəng kimdən gəldi?
– Azər müəllim (komandasının baş məşqçisi Azər Bağırovu nəzərdə tutur – red.) və Orxandan (komanda yoldaşı Orxan Əliyevi nəzərdə tutur – red.). Onların futbola qayıtmağımda əməyi çox oldu. Tərəddüd etsəm də, çox təkid etdilər. Amma yaxşı ki qayıtdım. Ailəm də bu məsələdə mənə dəstək oldu. Kiməsə özümü sübut etmək üçün qayıtmağı da çox istəyirdim. Futbolda itirdiklərim çox olub. Onları geri qaytarmaq lazımdır. Başıma gələnlər mənə çox dərs oldu.
– Nə qədər müddətə formanı yığdınız?
– Fiziki durumum həmişə yaxşı olub. Mənə futbola qayıtmaq üçün fiziki yox, mənəvi güc lazım idi. Qayıtmaq üçün motivasiyam çox idi. Hazırda da özümü heç kimdən zəif görmürəm. Artıra-artıra gedirəm. Pozitiv düşünürəm.
– 2018-ci ildə "Sabah"a keçdiniz. 2 il sonra bu klubdan ayrıldınız. Hər şey orada başladı?
– Orda da mənə qarşı hörmətsizlik olub. Həmişə danışan olduğumdan, xaraktercə emosional olduğumdan, başıma bu işlər gəlib.
– Özünüzdə də səhv olub?
– Bəli, olub. Ola bilər ki, bəzi şeylərə etiraz edib deməməliydim. Hər şey xarakterimlə bağlıdır. Hər kəsin yanaşma tərzi fərqli olmalıdır.
– Özünüzü sübut etmək istədiyiniz insanlar indi də Azərbaycan futbolunda var?
– Bəli. İndi onlar mənim necə olduğumu görürlər.
– Onda həmin komandalara qarşı oynayanda sizdə prinsipiallıq var?
– 100%. Mənə kim zərbə vurubsa, onun cavabını verməliyəm. Ömür boyu belə olacağam. Mənim üçün klubun adı, rəhbəri və s. önəmli deyil. Haqsızlıq ediblər, cavablarını verməliyəm.
